VOV4.Bahnar - Yak trŭh sơnăm ‘bnao 2022, dêh char Kon Tum hlôi đei 36 tơring iŏk đei jing tơring tơrang ‘nao, lơ̆m au đei lơ tơring tơ̆ tơring kon kông. Tơdrong jang tơ iung pơjing tơring tơrang ‘nao tơ̆ dôm tơring au đei ƀôh, gơnơm lang să đei dôm tơdrong jang ‘lơ̆ng đơ̆ng rim bơngai kon pơlei, kon pơlei lui kiơ̆ kơ jăp, pơm kiơ̆ ‘lơ̆ng trong bơ̆ jang đơ̆ng Đảng, khŭl kơdră tơring kơna tôch rơvơn lơ̆m tơdrong hơdrin jang keh đang rim trong pơkăp.

Bí thư Chi bộ A Khế (găh ‘ma) atŭm hăm Kơdră chĕp pơgơ̆r tơring Đak Hring dăr lăng tơdrong jang pơm rông pơlei

Dôm năr au, atŭm hăm tơdrong chơt hơ iă kơ dĭh găh tơdrong jang sa iŏk đei kơ ŭnh hnam, kon pơlei oei lơ̆m pơlei Kon Hnông Pêng, tơring Đak Hring, apŭng Đak Ha, dêh char Kon Tum oei chơt hơ iă atŭm, ‘nŏh hơmet ăn et hơtŏk rông pơlei. Rông kơjung hlŏh 10met, să dang 120m2 lăp pă hơtơ̆m gia dơ̆ng ‘nŏh đang bơih, Têt au pơm hơnĭh pơgâu et sa kơ pơlei.

Ƀok A Khế, Bí thư Chi bộ pơlei Kon Hnông Pêng tơbăt, mă đơ̆ng kơdră tơring Đak Hring hlôi tơgŭm djru đơ̆ng blŭng hloi vă 219 ŭnh hnam kon pơlei găh lơ hơdrung Xơ Dang vang kơrŭn jơhngơ̆m pơm đei rông ‘nŏh tơdrong ư̆h kơ ƀônh ƀŏ yă kiơ ôh. ‘Ngoăih jrăng man hăm ƀêtong, pơ đĭ pơjô̆, tơpok, hơkơ̆l au to jei pơm hăm ‘long, pơle gia ngăl. Vă kon pơlei yak kơtĕch 5km trong năm kăt gia pơm pơbŭng, yak hlŏh 10km kŏh ‘long chrăh pơm pơjô̆... ‘nŏh kơ dĭh Bí thư Chi bộ A Khế ling lang jing bơngai pơm jŭk yŭk trong hơlau, jang răh chă pơrô̆ pơrôp kon pơlei răh vă jang keh đang tơdrong tĭh:“Jĭ Bí thư Chi bộ kơna ba pơma hăm kon pơlei ‘nŏh Rông pơlei đĭ hư bơih kăl đei rông ‘nao. Rơvơn hlŏh dơ̆ng ‘nŏh kang ƀô̆ tơring hlôi tơgŭm ăn bơ̆n chuơ̆h, xi măng, mam vă man jrăng mă lei kon pơlei jei vang kơrŭn jơhngơ̆m ‘nei mă keh đang. Đơ̆ng nŏh bơih ư̆h khan lăp đon vang năm kŏh ‘long, kăt gia pơm rông, mă lei minh ŭnh hnam kon pơlei oei vang chă tơra dơ̆ng 500.000 hlak jên vă răt tơmam drăm au to. Kon pơlei mơ̆ng păng pơm kiơ̆ ba ‘nŏh ba jei kăl yŭk trong hơlâu iung jang đĕch bơih”.

 Kon pơlei chong choh pơ ‘lơ̆ng trong năm tơ̆ chŭn mir

Hăm yŭk trong hơlau ‘nŏh Bí thư Chi bộ A Khế, đơ̆ng nŏh rim đảng viên Y Oanh, A Kiên, A Wir… pơlei Kon Hnông Pêng hlôi jang keh đang Trong tơlĕch jang mă 6 găh hơnĭh jŏh ayŏ kơdŏ soang au to lơ̆m tơdrong jang Tơ iung pơjing tơring tơrang ‘nao. ‘Ngoăih kơ ‘nŏh, dôm đảng viên au oei yŭk trong hơlau lơ̆m tơdrong atŏk tơ iung mŭk drăm, tơ iung pơjing ŭnh hnam oei sa ‘lơ̆ng rŏ hơbŏ nhen, vei kơ jăp tơdrong sơđơ̆ng, rơgŏh atum lơ̆m pơlei… kơna kon pơlei lui kiơ̆ păng pơm kiơ̆.

‘Nao au vă pơ̆ih să trong pơlei vă kon pơlei chă yak, chơ tơmam drăm hiôk hian, ŭnh hnam A Sương păng A Khánh hlôi plang ăn tĕh kơ dĭh vă yua atŭm ăn kon pơlei. Hơmet pơ ‘lơ̆ng tơdrong jang sa, mơ̆ng kiơ̆ nơ̆r pơrô̆ pơrôp đơ̆ng rim đảng viên, lơ kon pơlei hlôi hŭt hloi tơdrong tep pok, iung klui, vei kơ jăp chă jang sa ƀlep jơ ‘năr păng hơdrin hŏk pơhrăm vă jang sa iŏk yua kơ jăp.

Hrei au pơlei Kon Hnông Pêng hlôi đei 70 ŭnh hnam kon pơlei iŏk jang răih kơ jăr ksu hăm 2 mir đak lar lơ̆m tơring. Jên khei jô̆ hơtŏ lơ̆m sơnăm au ki mĭnh ‘nu iŏk đei đơ̆ng 6 trŭh 7 trĭu hlak jên lơ̆m 1 khei. Năr vă jê̆ Têt mĭnh ‘nu bơngai jang tơ̆ Mir đak lar đei hơpăh dơ̆ng jên khei khei mă 13 đei trŭh 10 trĭu hlak jên. Ƀok A Phinh, mĭnh ‘nu kon pơlei lơ̆m pơlei tơbăt, ba ƀô̆h tơ iung pơjing tơring tơrang ‘nao ‘nŏh lăng ba trŭh ăn kon pơlei, đảng viên lơ̆m pơlei yŭk trong hơlau dơ̆ng, ba hăm đĭ đăng kon pơlei jei hơdrin vang jang kiơ̆: “Kang ƀô̆, đảng viên pơma ƀlep ‘nŏh ba mơ̆ng pơm kiơ̆. Kon pơlei vang tơgoăt mĭnh ƀơ̆r đon vă tơ iung pơjing tơring tơrang ‘nao. Lơ̆m ŭnh hnam ‘nŏh chă jang sa, pơm kŏng nhân ksu vă atŏk tơ iung mŭk drăm. Tơdrong jang lơ̆m pơlei ‘nŏh vang iung jang pơm trong nơnăm lơ̆m pơlei, hơpuih rơgŏh ‘lơ̆ng trong koeng ƀôt mă ‘lơ̆ng”.

Trong tơring tơrang ‘nao tơ̆ tơring Đak Hring

Atŭm hăm jang keh đang rim trong tơlĕch jang găh tơ iung pơjing tơring tơrang ‘nao, trŭh dang ei rim ŭnh hnam lơ̆m pơlei Kon Hnông Pêng hlôi đei lơ tơdrong tơplĭh kơtang. Hnam gơglơng rơgŏh ‘lơ̆ng, kon hơ ‘lơ̆p đei mĕ ƀă vei lăng năng tông hok pơhrăm tôm. Lơ̆m pơlei lăp hơdrô̆ ŭnh hnam bơngai ‘lŏ kră, bơngai hơdro po, ư̆h kơ đei bơngai jang sa ‘nŏh găh ŭnh hnam dơnŭh păng dôm yơ jei đei ƀô̆h ngăl. Lơ̆m mă hơnăn dôm ŭnh hnam jang sa iŏk đei đơ̆ng 100 trŭh dôm hrĕng trĭu hlak jên lơ̆m mĭnh sơnăm nhen A Phinh, A Cần, A Plo, A Ir…roi năr roi lơ, ‘nŏh hơnăn ŭnh hnam dơnŭh roi năr roi tŏ sĕt. Tơroi găh tơdrong tơ iung pơjing tơring tơrang ‘nao kơ kon pơlei oei lơ̆m pơlei Kon Hnông Pêng, ƀok Nguyễn Văn Dũng, Bí thư Đảng tơring Đak Hring, apŭng Đak Ha tơbăt:“Hơnăp jang kơ kon pơlei tơ̆ au hlôi jang kiơ̆ tôch kơ ‘lơ̆ng, mă kăl hơnăp jang kơ ƀok Bí thư Chi bộ hlôi chĕp pơgơ̆r, pơrô̆ Khŭl vei lăng pơlei đơ̆ng nŏh rim khŭl jang lơ̆m chă pơrô̆ pơrôp, pơtho khan ăn kon pơlei vang tơra tơgop tơ iung pơjing rim trong jang tơgop lơ̆m tơ iung pơjing tơring tơrang ‘nao kơ tơring. ‘Ngoăih kơ ‘nŏh, rim ŭnh hnam jei ƀô̆h hơdăh tơdrong tơ iung pơjing tơring tơrang ‘nao ‘nŏh tơdrong jang tơm jĭ yuơ kơ kon pơlei. Kon pơlei jei hlôi lăp đon vang tơgop năr jang tơ iung pơjing tơring tơrang ‘nao”.     

Gơnơm lang să đei tơdrong jang ‘lơ̆ng đơ̆ng dôm bơngai chĕp kơ̆l, yŭk trong hơlau kơ pơlei Kon Hnông Pêng adoi nhen 8 pơlei uơ oei lơ̆m tơring, vă đĭ sơnăm 2021 au ki tơring Đak Hring hlôi jang keh đang 19 lơ̆m 19 trong tơlĕch jang vang mơ̆t lơ̆m khŭl 36 tơring tơrang ‘nao kơ dêh char Kon Tum. Têt au, pơyan pŭih mak au atŭm hăm tơdrong chơt hơ iă ‘nă hal phĭ tơtŏ dơnŏ ‘lơ̆ng dơ̆ng kơ jăp lơ̆m rim ŭnh hnam, kon pơlei tơ̆ au oei đei tơdrong chơt hơ iă atŭm păng hưch hanh hơmanh bơnê hlŏh dơ̆ng găh pơlei pơla kơ dĭh tŏk bŏk roi năr roi tơplĭh ‘nao, atŏk tơ iung hlŏh dơ̆ng.

Bơngai chĭh: Khoa Điềm

Tơblơ̆ nơ̆r: Amazưt