VOV4.Bahnar - Lăp đơ̆ng rŏng lơ pơyan pơdơ̆h hŏk găh lơ lăp oei tơ̆ hnam vă tang găng jĭ hơbŭh Covid-19, pơyan pơdơ̆h hŏk sơnăm au rim đe hơ iŏh tơ̆ dêh char Kon Tum hlôi đei vang iung jang rim tơdrong mă kơ dĭh ‘meh vă. Băt hơdăh tơdrong au, rim Hnam jŏh ayŏ, khŭl jang, rim bơngai tơ̆ Kon Tum hlôi pơjing hơnih pơchơt pơ hiơ̆ vă đe hơ iŏh rơ̆ih kơ dĭh chă pơm ngôi.

Rin đe ŏh pơhrăm tôn sơgơ̆r, lăm hlă jang Đô̆i

Ư̆h kơ mơ̆ng bri ‘năr tŏ hlơ hlĕng, khŭl 30 ‘nu oh hŏk tro đơ̆ng lăm 6 trŭh lăm 8, hnam trương jăl ƀar Nguyễn Sinh Sắc tơ̆ pơlei tơm Kon Tum, dêh char Kon Tum hơngŭr chă pơ hrăm tơdrong jang Đô̆i. Ŏh Lã Đình Hòa An, hŏk tro lăm 6Y tơbăt, ŏh đei tơdrong hlă kơna chĭh hơnăn vang chă pơhrăm tơdrong jang Đô̆i kơ yuơ Dơnŏ anĭh jŏh ayŏ Đă ƀŏng lŏng tơplŏng kơdau hơ iŏh dêh char Kon Tum pơ̆ih lơ̆m khei pơdơ̆h hŏk. Hăm ŏh Lã Đình Hòa An, pơyan pơdơ̆h hŏk au tôch chơt hơ iă tơpă mơ̆n:“Pơyan pơdơ̆h hok au nhôn hmơ hmêu vang chă hŏk pơhrăm rim tơdrong jang hơ iă hlŏh, chă pơma dơnŭh dĭh băl, tơroi dĭh băl dôm tơdrong au to mă bơ̆n ư̆h kơ đei chă pơma dơnŭh tơroi hăm bu lơ̆m khei ‘năr đei jĭ hơbŭh Covid-19. ‘Măng pơdơ̆h hŏk au ‘ngoăih lăm au ‘nŏh ŏh jei vang chă hŏk pơhrăm biŏh, glơi adoi nhen dôm tơdrong pơhrăm chhơ̆”.

Lăm pơtho glơi tang găn glơ̆k đak kơ Hơnĭh tơm vei lăng Jŏh ayŏ Đă ƀŏng lŏng tơplŏng kơdau Hơ iŏh dêh char Kon Tum

Jĭ hơbŭh Covid-19 đei tang găn kĕ ƀiơ̆, pơyan pơdơ̆h hŏk au tơbăt hơdăh tơdrong pơgơ̆r dơ̆ng kơ rim hơnĭh pơchơt pơ hiơ̆ ăn đe hơ iŏh păng akŏm lơ hlŏh tơ̆ pơlei tơm Kon Tum. Atŭm hăm rim lăm hlă kơ rim Hơnĭh, hnam jŏh ayŏ, rim mĕ ƀă hŏk tro jei gơ̆h chă rơ̆ih dôm lăm hŏk tơdrong hlă kơ yuơ khŭl jang, rim bơngai pơ̆ih vă tơgŭm ăn kôn mon kon hơ ‘lơ̆p atŏk tơ iung jơhngơ̆m đon hlă. Mŏ Đặng Linh Ngọc, mĕ ŏh Nguyễn Đặng Gia Hân, 6 sơnăm, hnam oei tơ̆ Tô 1, phương Duy Tân ăn kon hơ ‘lơ̆p năm hŏk pơhrăm tơdrong hlă asoang tơ̆ trong Hoàng Thị Loan, tơbăt:“Ƀô̆h kon hơ ‘lơ̆p jei hlă găh asoang, hơri păng chhơ̆. Rim kôn mon đĭ pơdơ̆h hŏk, ‘ngoăih oei tơ̆ hnam ‘nŏh jei ‘mĕh vă rim đe mon năm tơ̆ hơnĭh pơgơ̆r vă chă hŏk pơhră păng pơchơt pơ hiơ̆. Mă ƀar ‘nŏh rim đe mon chă pơhrăm jơhngơ̆m jăn ‘nŏh ‘lơ̆ng hlŏh pơtêng hăm chă oei tơ̆ hnam. Jei đei kơ tơ̆ng bôl boăl anai chă tơroi găh hơnĭh au kơna ĭnh năm ba hơmŏ hơ măi chă gơ̆h tŏ sĕt tơdrong au to”.

Khei pơdơ̆h hŏk sơnăm au, atŭm hăm rim lăm pơtho đon hlă, hŏk pơhrăm tơdrong băt vao tôm tơdrong, kơ trăi pơyan pơdơ̆h hŏk hlôi joăt joe, nhen: hŏk chhơ̆, hŏk reh Organ, biŏh, hŏk pơhrăm pơm ƀô̆ đô̆i ... rim đe oh hơ ioh tơ̆ Kon Tum oei rơ̆ih dôm tơdrong pơhrăm hle nhen: Tơdrong pơgơ̆r tơmang pơ hiơ̆ cham char; Pơbŭng hnam hơ iŏh; asoang tik tok… Păng tơ hơnăp tơdrong ‘mĕh vă pơhrăm tơdrong hlă kơ đe hơ iŏh, tơ̆ dêh char Kon Tum ‘ngoăih dôm hơnĭh pơgơ̆r jŏh ayŏ au to kơ Tĕh đak oei đei ƀô̆h tơdrong vang iung jang đơ̆ng lơ hơnĭh jang, rim bơngai lơ̆m pơjing hơnĭh pơchơt pơ hiơ̆ ăn đe hơ iŏh. Kiơ̆ đơ̆ng ƀok Phạm Văn Thắm, Kơ iĕng Kơdră chĕp pơgơ̆r Hơnĭh bơ̆ jang Jŏh ayŏ đă ƀŏng lŏng tơplŏng kơdau hơ iŏh dêh char Kon Tum, ‘nau jing tơdrong ‘lơ̆ng hơ iă pơjing đei lơ hơnĭh, pơjei dĭh băl ‘lơ̆ng hơ iă păng đei iŏk yua ‘lơ̆ng liĕm ăn đe hơ iŏh:“ ‘Nŏh jing tơpôl vang iung jang hơdoi tơdrong pơgơ̆r jŏh ayŏ au to. Dôm tơdrong pơgơ̆r au đe pơjing đei lơ tơdrong hơ iă nhen Lăm hŏk pơtho rĕh bơ̆n đơn, lăm hŏk pơtho hơri, lăm hŏk pơtho asoang. Dang ei đe jei vang pơgơ̆r bơih ư̆h khan nhen lĕ đunh kơ au 10 sơnăm lăp hơdrô̆ Hơnĭh vei lăng jŏh ayŏ pơgơ̆r đĕch ôh. Kăl tơmơ̆t jên răt tơmơ̆t tơmam drăm ‘lơ̆ng hơ iă, bơngai pơtho pơhrăm hơgei, ‘lơ̆ng hơ iă ‘nŏh mă đe hơ iŏh lŭ lăp năm hŏk pơhrăm lơ păng hŏk tơdrong hlă jei jing hơnĭh chă năm hŏk pơhrăm kơ dĭh ư̆h khan athei đe hơ iŏh kăl năm hok pơhrăm hloi ôh”.

Lăp đơ̆ng rŏng lơ pơyan pơdơ̆h hŏk găh lơ lăp oei tơ̆ hnam vă tang găng jĭ hơbŭh Covid-19, pơyan pơdơ̆h hŏk sơnăm au rim đe hơ iŏh tơ̆ dêh char Kon Tum hlôi đei vang iung jang rim tơdrong mă kơ dĭh ‘meh vă. Rim lăm hŏk tơdrong hlă au to dang ei tŏk bŏk đei lơ đe hơ iŏh vang năm hŏk pơhrăm. Rim lăm hlă kơ rim Hơnĭh, hnam jŏh ayŏ, rim mĕ ƀă hŏk tro jei gơ̆h chă rơ̆ih dôm lăm hŏk tơdrong hlă kơ yuơ khŭl jang, rim bơngai tơ̆ dêh char Kon Tum jei tŏk bŏk lăng trŭh rim tơdrong pơgơ̆r tơ̆ rim apŭng atăih yăih vă pơjing lơ hơnĭh pơchơt pơ hiơ̆ ăn đe hơ iŏh lơ̆m khei năr pơdơ̆h hŏk sơnăm au.

Bơngai chĭh: Khoa Điềm

Tơblơ̆ nơ̆r: Amazưt