VOV4.Bahnar - Lơ̆m 2 năr au ki, tơdrong ƀok Chu Ngọc Anh, Kơdră so chĕp pơgơ̆r Dơnŏ anĭh vei lăng kon pơlei kơ pơlei tơm Hà Nội păng Nguyễn Thanh Long, Kơdră so Dơnŏ anĭh tơm vei lăng jang pơgang đei tơchơ̆t tơlech hŭt jang Đảng, kăt kơchư̆k; tơkêng, rôp chĭt ‘nŏh tơdrong mă rim kang ƀô̆, đang viên păng kon pơlei Kon Tum trĕng lăng kơ jăp.

Ƀok Trương Duy Cảnh.

Ƀok Trương Duy Cảnh, 69 sơnăm, 40 sơnăm jang Đảng oei lơ̆m kơsô̆ hnam 104, trong Phạm Văn Đồng, phương Lê Lợi, pơlei tơm Kon Tum tơbăt jơhngơ̆m đon, tơdrong jang tang găn sa pơgơ̆m pơjĭp ‘nŏh tơdrong jang gĭt kăl hơnơ̆ng kơ Đảng. Mă lei, ƀok tim lăh ƀôh tơdrong au đei tơlĕch jang tôch kơ tang, tĕnh koăng păng kơ hret hơ lau. Hlŏh đơ̆ng tơdrong ƀok Chu Ngọc Anh hăm Nguyễn Thanh Long, ƀok sa roi lui kiơ̆ kơtang hlŏh dơ̆ng lơ̆m tơdrong iung jang tang găn sa pơgơ̆m pơjĭp đơ̆ng Đảng păng đơ̆ng kơ dĭh kau Tổng Bí thư Nguyễn Phú Trọng: “Ba lui tơpă Đảng bơ̆n iung jang kơ hret hăm dôm bơngai pơlơ̆m kơchư̆k tĭh sa pơgơ̆m pơjĭp kon pơlei, sa pơgơ̆m pơchĭp tĕh đak, jơhngơ̆m đon kơnê̆. Âu ki, Kơdră chĕp pơgơ̆r Dơnŏ anĭh tơm vei lăng jang pơgang Nguyễn Thành Long hăm ƀok Chu Ngọc Anh, kơchư̆k tĭh tơpă, mă lei ư̆h khan kơ yuơ bơ̆n đei kơchư̆k tih ‘mĕh pơm kiơ gơ̆h ngăl. Ĭnh hơpơi, đĭ đăng bơ̆n vang kơrŭn jơhngơ̆m tơ iung pơjing păng vang iung tơ jră vă tang găn kĕ tơdrong sa pơgơ̆m pơjĭp, tang găn jơhngơ̆m đon vir hăm dôm kang ƀô̆, đang viên”. 

Tơblơ̆ nơ̆r: Amazưt