VOV4.Bahnar - Lơ̆m 2 năr, ‘năr 10 păng 11/10 tơ̆ apŭng Tu Mrông, dêh char Kon Tum đei ‘mi tih. Vă tang găn đak tih tơ jroh păng tĕh hơ lih, apŭng Tu Mrông asong ăn hŏk tro pơ dơ̆h hŏk vă gơ̆h sơ đơ̆ng ‘lơ̆ng. Mă hơ dăh, Dơ nŏ anih vei lăng kon pơ lei apŭng Tu Mrông athei Anih vei lăng pơ tho pơ hrăm apŭng roi tơ băt ăn hŏk tro pơ dơ̆h hŏk đơ̆ng ‘năr 11/10 păng lăp ăn hŏk tro năm hŏk dơ̆ng tơ̆ hnam trưng gô sơ đơ̆ng ‘lơ̆ng bơih đĕch.

Hŏk tro apŭng Tu Mrông năm hŏk dơ̆ng đơ̆ng rŏng ‘mi kial kơ sô̆ 4- Noru

Ƀok An Văn Sáu, Kơ dră Anih vei lăng pơ tho pơ hrăm apŭng Tu Mrông ăn tơ băt, Anih tơ tom roi tơ băt ăn 25 hnam trưng lơ̆m apŭng păng đei 8.224 ‘nu hŏk tro rim jăl hŏk hlôi pơ dơ̆h hŏk oei tơ̆ hnam vă vĕh ver tơ drong krê hơ mơt đơ̆ng ‘mi tih đak tơ jroh. Khul thây kô vei lăng hnam trưng, thây kô pơ tho tơ̆ dôm hnam trưng kŭm pơ tho ăn đe ŏh hŏk tro pơm kiơ̆ 1,2 trong vei lăng sơ đơ̆ng mưh ‘mi tih đak tơ jroh, tĕh hơ lih lơ̆m jơ năr oei tơ̆ hnam nhen: Lê̆ lĕch ngôi tơ ter đak krong, thong đak, chă yâu ka, dui hơ tŏk ‘long unh hoch tơ̆ đak; lê̆ năm tơ̆ gơng đak oei lơ̆p blai, năm tơ̆ dôm anih đei tĕh hơ lih.

VOV Tây Nguyên/Dơ̆ng tơ blơ̆