Kơ tơ̆ng ang đơ̆ng Anih vei lăng găh pơtho pơhrăm dêh char Kon Tum ăn ƀôh, hăm jăl Mầm non dang ei dêh char oei ưh kơ măh hloh 700 ƀiên chê̆, Jăl 1 ưh kơ măh 477 ƀiên chê̆, Jăl 2 ưh kơ măh vă jê̆ 500 ƀiên chê̆ păng Jăl 3 ưh kơ măh 43 ƀiên chê̆. Vă hơ met ‘lơ̆ng tơdrong ưh kơ măh thây kô pơtho, anih jang găh pơtho pơ hrăm dêh char Kon Tum jang kiơ̆ proh hơ met, tơ mơ̆t hơ dai dôm anih pơtho pơ hrăm mầm non, phổ thông teh đak đei hơ nih iĕ; klăih song, hơ met ăn khŭl kang ƀô̆ vei lăng, thây kô pơtho, bơngai jang lơ̆m tơ ring kơ rim apŭng, hơ met ‘lơ̆ng tơdrong rơ kăh, ưh kơ măh tơ̆ dôm tơ ring; klăih song, hơ met ăn thây kô jăl 3 pơ tho 1,2 tiết tơ̆ jăl 2, thây kô jăl 2 pơtho 1,2 tiết tơ̆ jăl 1. Ƀok Thái Khắc Hòa, Kơ dră Anih vei lăng pơtho pơhrăm dêh char Kon Tum tơ băt, lơ̆m pơlei tơm ưh kơ măh vă jê̆ 160 ‘nu thây kô kơ tă pơtho tơ̆ lăm, kơ na trong jang ‘noh ji:

“Proh hơmet dơ̆ng lăm vă hơ met ăn thây kô pơtho vei sơđơ̆ng trŏ lăp tơ̆ dôm hnam trưng. Jang kiơ̆ tơ mơ̆t hơ dai hnam trưng le tơ̆ hnam trưng tơm hlôi tơ mơ̆t hơ dai đei 7 hnam trưng, lơ̆m noh đei 2 hnam trưng mầm non păng 5 hnam trưng jăl 1. Jang kiơ̆ ăn tơ plih thây kô pơtho đơ̆ng hnam trưng rơ kăh năm pơ tho tơ̆ hnam trưng ưh kơ măh vă proh hơ met mă lăp tơdrong pơ tho đơ̆ng dôm hnam trưng. Hăm dôm môn oei ưh kơ măh nhen môn Tin học, nơ̆r Anh jăl 1 anih jang hlôi hơ met ăn thây kô pơtho 2 hnam trưng. ‘Ngoăih kơ ‘noh anih jang hlôi hơmet ăn thây kô pơtho Tin học, nơ̆r Anh jăl 2 pơ tho Tin học, nơ̆r Anh tơ̆ jăl 1”.

Kô Cao Thanh Diễm Quỳnh pơtho nơ̆r Anh tơ̆ 2 hnam trưng hŏk jăl 1 tơ̆  Kon Tum

Tơ̆ Gia Lai, dang ei kŭm tŏk bŏk ưh kơ măh hloh 3700 thây kô pơtho tơ̆ lăm. Ƀok Phạm Văn Đại – Kơdră anih vei lăng pơtho pơhrăm apŭng Ia Grai tơbăt, dang ei oei ưh kơ măh vă jê̆ 300 thây kô pơtho. Jang kiơ̆ tơdrong hơ găt đơ̆ng tơdrong jang pơtho pơhrăm phổ thông akŏm 2018, sơnăm hŏk 2022-2023 gô jing sơnăm mă blŭng môn hŏk nơ̆r Anh păng Tin học jing môn hŏk pơ gŏ đơ̆ng lăm 3 tơ̆ jăl 1, tơ plih yua kơ chă rơ̆ih kơ dih nhen hơdrol sơ̆. Tơpă yan âu ‘nâu pơm ăn apŭng mă hlôi tŏk ưh kơ măh lơ thây kô pơtho ‘noh hơ nơ̆ng tơ ƀơ̆p mơ mat tat ƀơ̆t tam mă pơm lăp tôm kơ sô̆ thây kô pơtho vei lăng 2 môn ‘nâu.

“ Hrei ‘nâu mơ mat tat đơ̆ng anih vei lăng pơtho pơhrăm apŭng Ia Grai ‘noh jĭ pơm kiơ̆ tơdrong pơtho hŏk hla ar hŏk ‘nao hăm môn anh văn lăm 2 păng tin học lăm 3 hrei ‘nâu ưh kơ măh tôch kơ lơ. Hăm akŏp kơ sô̆ thây kô pơtho anh văn oei ưh kơ măh tŏ sĕt lơ̆m 1 hnam trưng hŏk ‘noh oei 5 hnam trưng tam mă đei thây kô pơtho anh văn păng 8 hnam trưng tam mă đei thây kô pơtho Tin học kơ na tôch kơ mơ mat tat.”

Ƀok Nguyễn Đình Thức – Kơdră anih vei lăng pơtho pơhrăm pơlei tơm Pleiku ‘noh tơƀăt, tơ ring oei ưh kơ măh dang 600 thây kô pơtho. Vă vei sơ đơ̆ng ‘lơ̆ng pơtho păng hŏk, anih vei lăng pơtho pơhrăm akŏm lăng kăl truh tơdrong proh hơmet, sơ đơ̆ng dơ̆ng khŭl  thây kô pơtho tơ̆ dôm hnam trưng hŏk. Hơdai hăm ‘noh, kiơ̆ lơ̆m ƀiên chê̆ đei pơ jao, kơchăng pơm hla ar pơ kăp hăm thây kô pơtho, bơngai jang oei ưh kơ măh.

“ Anih jang hlôi pơ gơ̆r bơ̆ jang hăm dôm hnam trưng vă dăr hơ len dơ̆ng hnam trưng lăm hŏk păng hơ met ăn thây kô pơ tho tơ̆ dôm hnam trưng. Tơ̆ hơ năp tơdrong ưh kơ măh lơ thoi noh ‘noh hlôi pơma dơ nuh hăm dôm hnam trưng proh hơmet dơ̆ng hnam trưng, lăm hŏk, akŏm tơ gep hnam trưng lăm hŏk 1 trong tôch ai vă ‘mơ ‘met ƀiên chê̆ đei pơ jao ăn. Anih jang kŭm apĭnh rim kơ dră gơh kĭ ăn set hơ len kiơ̆ lơ̆m dôm tơdrong hơ găt đơ̆ng anih jang, đơ̆ng teh đak vă hơ met ăn tôm kơ sô̆ thây kô pơtho kŭm nhen bơngai ăn dôm hnam trưng vă tơlĕch jang tơdrong pơtho hŏk.”

Lơ̆m dêh char Dak Lak ưh kơ măh dang ei 1.260 ‘nu thây kô pơtho đơ̆ng Mầm non truh jăl 3

Ƀok Lê Duy Định – Kơdră Anih vei lăng găh pơtho pơhrăm dêh char Gia Lai tơbăt tŏk bŏk jang hơdai hăm rim tơ ring vă jô̆ hơ len, jang tơgŭm ăn Anih vei lăng kon pơlei dêh char tơchơ̆t klăih song tơ klep hăm proh hơ met, pơgơ̆r dơ̆ng hnam trưng lăm hŏk, akŏm dôm hnam trưng, hơ tŏk kơ sô̆ hŏk tro 1 lăm truh kơ sô̆ lơ kiơ̆ tơdrong pơ kăp dôm jăl hŏk. Đơ̆ng rŏng jang đang dôm tơdrong ‘nao jô̆ hơlen dơ̆ng tơdrong ưh kơ măh, tôm thây kô pơtho tơ̆ dôm tơ ring vă pơ gơ̆r klăih song 1.244 ƀiên chê̆ mă Trung ương pơ jao.

 “ Hăm dôm lăm tơ̆ jăl 1 athei 35 ‘nu hŏk tro 1 lăm, oei hăm dôm lăm tơ̆ jăl 2 ‘noh athei 45 ‘nu hŏk tro 1 lăm. Dôm apŭng jang kiơ̆ tơdrong tơmơ̆t hơ dăh dôm hnam trưng kŭm nhen tơdrong vei sơ đơ̆ng kơ sô̆ hŏk tro tơ̆ lăm thoi noh gô ‘mơ ‘met đei lơ thây kô pơtho. Ƀơ̆t đei tơmơ̆t dơ̆ng lơ ƀiên chê̆ thây kô, akŏm thim tơdrong tơ mơ̆t hơ dai dôm hnam trưng kŭm nhen hơ met ăn kơ sô̆ hŏk tro tơ̆ lăm ‘noh tơdrong hiôk pơtho pơhrăm tơ̆ dêh char Gia Lai gô đei tôm thây kô pơtho tơ̆ lăm.”

Kŭm hăm dôm trong jang pơgia ƀơ̆t măt, vă hơmet ‘lơ̆ng tơdrong ưh kơ măh thây kô pơtho, Anih vei lăng găh pơtho pơhrăm dôm dêh char lơ̆m tơ ring Tây Nguyên kŭm hlôi apĭnh Anih tơm vei lăng găh pơtho pơhrăm jang tơgŭm khŭl kơ dră teh đak tơ mơ̆t dơ̆ng ƀiên chê̆ pơtho pơhrăm oei ưh kơ măh. Đei trong jang tơgŭm chă rơ̆ih bơngai jang hăm sinh viên sư phạm đei tơgŭm jên nôp hŏk, jên oei sa kiơ̆ tơdrong hơgăt tơ̆ tơchơ̆t kơ sô̆ 116 đơ̆ng Khŭl kơdră teh đak vă hiôk ăn tơ ring găh tơdrong rơih iŏk.