VOV4.Bahnar - Pơ gê ‘năr 2/6, tơ̆ apŭng Đăk Hà, Anih jang đoan dêh char Kon Tum pơ gơ̆r lêh tơ lĕch jang tơ drong jang Hơ druh tơ dăm năm jang tơ gŭm pơ yan he sơ năm 2022. Tơ drong jang âu đei dôm tơ drong jang nhen: Đoàn viên, hơ druh tơ dăm vang jang pơ jing tơ ring tơ rang ‘nao, vei lăng cham char, tơ jră hăm tŏ ‘mi kial tơ plih; vei lăng ăn hơ ioh, vang jang tơ gŭm kon pơ lei đei ƀơm ưh kơ ‘lơ̆ng đơ̆ng jĭ COVID-19; tơ roi tơ băt Luơ̆t hơ druh tơ dăm; pơ gơ̆r tơ mơ̆t đoàn viên, khŭl jang ‘nao...

Kon Tum tơ lĕch jang tơ drong jang hơ druh tơ dăm năm jang tơ gŭm pơ yan he sơ năm 2022

Tơ̆ lêh tơ lĕch jang, Anih jang đoàn dêh char Kon Tum asong 50 tơ pu tơ mam ăn kơ đe oh hŏk tro mơ mat tat yak hloh hŏk hơ gei; asong kơ dŭng vei sơ đơ̆ng tơ drong arih sa ăn kơ 10 ŭnh hnam hơ druh tơ dăm kon kông, lui khop mơ mat tat; pơ jao tơ drong jang tơ jră râm rĕk hươ̆ iŏk akŏm tơ̆ tơ ring tơ rang păng tơ drong jang pơ gar ‘long jang sa, lăp hăm tơ plih tŏ ‘mi kial; asong 1.000 kơ chŏk đak toh ăn hơ ioh đei tơ drong arih sa mơ mat tat; pôk hơ păh 9 khŭl grŭp păng 9 ‘nu đei jang hơ gei hloh lơ̆m tơ lĕch jang dôm tơ drong jang Khei bơ̆ jang hơ druh tơ dăm sơ năm 2022.

Pơ gê brei 2/6, tơ̆ plt Pleiku, Anih jang đoan Gia Lai pơm “Lêh Khul druh dăm năm jang tơ gŭm pơ yan he sơ năm 2022” hăm tơ drong vang akŏm đơ̆ng 350 ‘nu đoàn viên druh dăm. Tơ drong jang sơ năm ‘nâu, Khul kơ dră chĕp kơ̆l đoan dêh char Gia Lai pơ jing 5 khul jang tơ gŭm, năm bơ̆ jang tơ gŭm lơ̆m 3 khei pơ dơ̆h he. Dôm tơ drong jang vă bơ̆ jang akŏm lơ tơ̆ dôm xăh sơ lam păng dôm xăh, dôm pơ lei oei adrin jang kĕh tơ drong pơ jing tơ ring tơ rang ‘nao lơ̆m sơ năm 2022. 

Lơ̆m tơ drong jang ‘nâu, sơ năm mơ lôh Gia Lai adrin pơm hơ met, păng pơm ‘nao 15km trong tơ̆ tơ ring; pơ tăm ‘nao 150.000 tơ nơm ‘lơ̆ng; man 3 tŏ hnam ăn bơ ngai mơ mat tat; Khăm, roi tơ ƀôh kơ chơ̆t bek, vei lăng jơ hngâm pran, vei rơ gŏh tơ mam xa ăn tŏ sĕt hlŏh ‘nŏh 1000 ‘nu kon pơ lei; man ‘nao păng hơ met ming 8 tŏ anih chă pơ yơ̆ng tơ̆ dôm hnam trưng; pơ tho tơ ƀôh trong iung jang xa ăn đe druh dăm.

Thuem hăm Dơ̆ng: Tơ blơ̆