VOV4.Bahnar -Hăm jơ nei hloh 10 năr dăr hơ len, băt hơ dăh păng rôp vei đei bơ ngai pơm glăi lơ̆m tơ drong “ Pơm glăi tơ drong hơ găt găh iŏk jang, vei lăng bri păng tơ mam bri ‘long”, Kŏng an apŭng Sa Thầy đei pôk hơ păh ưh kơ ê. Pơ gê ‘năr 20/9/2022 tơ̆ anih jang Kŏng an apŭng Sa Thầy, ƀok Dương Văn Trang, Bơ ngai jang lơ̆m Trung ương Đảng, Bí thư Anih jang Đảng dêh char, Kơ dră Jơ nŭm pơ gơ̆r kon pơ lei dêh char Kon Tum hlôi pôk pơ ư păng hơ păh ưh kơ ê 20 triệu hlak jên ăn khŭl tơ pôl Kŏng ăn apŭng Sa Thầy. Sơng iŏk hla ar hồ sơ tơ kêng yoch đơ̆ng Anih vei lăng bri ‘long apŭng, lơ̆m hloh 10 năr âu ki, Kŏng an apŭng Sa Thầy hlôi dăr hơ len, băt hơ dăh păng rôp vei đei 1,2 ‘nu pơm glăi tơ drong hơ găt găh iŏk jang, vei lăng bri păng tơ mam bri ‘long đei ƀôh tơ̆ tơ ƀôt 6, tiểu khu 692, teh bơ̆ jang xăh Mô Rai, apŭng Sa Thầy, găh teh bri ‘long yua đơ̆ng Kŏng ti jang găh Bri ‘long Sa Thầy vei lăng.

Ƀok Dương Văn Trang hmach chơt hơ iă kơ jơ nei phă tơ drong glăi đơ̆ng kang ƀô̆ khŭl linh Kŏng an apŭng Sa Thầy

Dang ei Kŏng an apŭng Sa Thầy tŏk bŏk krao hơ vơn dôm bơ ngai nai năm tơ roi vă hơ met ming hla ar hô sơ, jang pơ keh tơ drong ‘nâu. Bí thư Anih jang Đảng dêh char  Kon Tum kŭm athei Khŭl vei lăng đảng kơ Anih vei lăng kon pơ lei dêh char, Anih jang Đảng Kŏng an dêh char, Khŭl chĕp kơ̆l anih jang Đảng apŭng Sa Thầy hơ nơ̆ng hơ tŏk jơ hngơ̆m đon jang tơ năp, hơ tŏk loi dơ̆ng tơ drong jang vei lăng bri lơ̆m tơ ring; hơ tŏk ‘lơ̆ng hơ năp jang đơ̆ng tơ ‘ngla bri; hơ nơ̆ng dăr joang, tơ chă druh rôp, tơ tom chă ƀôh, sek phak tơ păt kiơ̆ tơ drong hơ găt đơ̆ng khôi luơ̆t hăm dôm tơ drong pơm glăi Luơ̆t Bri ‘long...

Thuem: Tơ blơ̆