VOV4.Bahnar - Hăm jơ hngơ̆m đon vang yak hơ dai hăm bơ ngai jang mơ dro sa, anih jang mơ dro sa, Anih vei lăng kon pơ lei dêh char Kon Tum ‘nao pơ gơ̆r Hop akŏm pơ ma dơ nuh hăm anih jang mơ dro sa. Hloh 10 nơ̆r tơ gop pơ ma kơ tă păng 32 nơ̆r tơ gop hăm hla ar gơ̆ih truh kơ dră chĕp kơ̆l Anih vei lăng kon pơ lei dêh char Kon Tum tơ̆ jơ pơ ma dơ nuh ăn ƀôh, grŭp tơ drong mă dôm anih jang mơ dro sa tŏk bŏk pơm tơ lĕch, tĕch mơ dro tơ̆ Kon Tum tơ ƀơ̆p ƀơm ‘noh jĭ tơ drong hiơ̆ hyĭn lơ̆m kĭ ăn trong tơ lĕch jang kŭm hăm dôm tơ drong tơ hlăk tơ hlĭn ƀơm truh teh. Hơ dai hăm ‘noh dôm tơ drong tơ hlăk tơ hlĭn đei ƀôh lơ̆m kơ plăh hơ len lăng, thuê bri vă pơ tăm pơ gang hla ‘long păng hơ tŏk tơ iung tơ mang lăng kŭm pơm ăn 1,2 tơ drong jang tơ ƀơ̆p mơ mat tat, hiơ̆ bơ̆ jang.

Ƀok Nguyễn Ngọc Sâm, Phŏ kơ dră Anih vei lăng kon pơ lei dêh char Kon Tum tơ̆l nơ̆r anih jang mơ dro sa ƀơm truh tơ drong chĕng hơ met iŏk yua teh

Khŭl jang mơ dro sa mơ lôh dêh char Kon Tum kŭm tơ roi 11 nơ̆r apĭnh hăm Anih vei lăng kon pơ lei dêh char Kon Tum. Lơ̆m noh, tơ gŭm hơ drol vă hơ met pơ ‘lơ̆ng mơ mat tat ăn anih jang mơ dro sa ‘noh jĭ jên tơ iung ming, hơ tŏk tơ iung pơm tơ lĕch. Hơ dai hăm tơ gŭm, pơm tơ drong hiôk vă anih jang mơ dro sa jang ‘lơ̆ng lơ̆m tơ drong gơ̆h iŏk yua teh vă tơ mơ̆t jên jang hơ tŏk tơ iung pơm tơ lĕch tĕch mơ dro. Chih iŏk dôm nơ̆r apĭnh, tơ lĕch đơ̆ng anih jang mơ dro sa, bơ ngai tơ mơ̆t jên jang, Kơ dră chep kơ̆l dêh char Kon Tum athei rim anih jang, chih iŏk, rơ̆ih dôm nơ̆r apĭnh, tơ lĕch đơ̆ng tơ pôl jang mơ dro sa vă tơ gŭm tơ lĕch ăn trong jang tơ gŭm găh tơ drong gơh kĭ ăn, akŏm, pơ truh ăn Trung ương mĭnh ƀar tơ drong anih jang mơ dro sa apĭnh, tơ lĕch tơ gŭm anih jang mơ dro sa yak hloh mơ mat tat, tơ iung ming pơm tơ lĕch, tĕch mơ dro, yak truh tơ drong tơm hơ tŏk tơ iung kơ jăp.

Thuem: Tơ blơ̆