VOV4.Bahnar - Pơ gê ‘năr (5/6), tơ̆ thị trấn Đăk Tô, apŭng Đăk Tô, Anih vei lăng kon pơ lei dêh char Kon Tum pơ gơ̆r lêh tơ lĕch jang Têt pơ tăm ‘long ling lang ƀlŏk hơ dơ̆r kơ ƀok Hồ sơ năm 2022 păng jang kiơ̆ Năr cham char apŭng plĕnh teh 5/6. Lăp đơ̆ng rŏng Lêh tơ lĕch jang, kơ dră chĕp kơ̆l dêh char Kon Tum, kang ƀô̆ dôm anih jang, khŭl grŭp kŭm hăm lơ lap kon pơ lei apŭng Đăk Tô hlôi iung jang pơ tăm kơ hrĕng tơ nơm ‘long lơ̆m hơ nih Cham să 24/4 păng 1,2 hơ nih lơ̆m thị trấn Đăk Tô.

Pơm lêh tơ lĕch jang Têt pơ tăm ‘long ling lang ƀlŏk hơ dơ̆r kơ ƀok Hồ sơ năm 2022 păng jang kiơ̆ Năr cham char apŭng plĕnh teh 5/6

‘Măng âu Anih vei lăng găh choh jang sa păng hơ tŏk tơ iung tơ ring tơ rang dêh char Kon Tum pơ gơ̆r asong hloh 157.700 tơ nơm ‘long hơ drĕch, ‘noh đei lơ kơ loăi nhen: ‘long tơ giĕr, ‘long sưa, hơ ngo pêng hla, ‘long tơ nơ̆ng...ăn kơ dôm anih jang, tơ ring lơ̆m dêh char pơ tăm pơm pơ rŏ ‘lơ̆ng ăn cham char. Lơ̆m pơ yan ‘mi sơ năm ‘nâu, dêh char Kon Tum tơ lĕch tơ drong hơ găt pơ tăm ‘nao 4.500hek tar bri păng hlôi klăih song hơ găt teh hơ dăh truh rim anih jang, rim tơ ring.

Thuem: Tơ blơ̆