VOV4.Bahnar - Jang kiơ̆ tơ drong jang pơ tăm 1 ti tơ nơm ‘long jăl jang 2021- 2025 đơ̆ng khŭl kơ dră teh đak, pơ gê ‘năr 25/3, tơ̆ pơ sat Linh lôch dŏng teh đak apŭng Tu Mơ Rông, Anih vei lăng tĕch mơ dro Kon Tum jang hơ dai hăm Anih vei lăng kon pơ lei apŭng Tu Mơ Rông pơ gơ̆r lêh tơ lĕch jang têt pơ tăm ‘long hăm hơ năn “ Bri gô tŏk jơk”. Lăp đơ̆ng rŏng pơm lêh tơ lĕch jang, dôm bơ ngai tang măt hlôi pơ tăm kơ hrĕng tơ nơm ‘long pơ kao mai anh đào lơ̆m păng ‘ngoăih cham Pơ sat linh lôch dŏng teh đak vă pơm hơ nih ‘lơ̆ng.

Bơ ngai tang măt pơ tăm ‘long tơ̆ lêh tơ lĕch jang

‘Ngoăih kơ ‘noh, Anih vei lăng kon pơ lei apŭng Tu Mơ Rông kŭm tơ lĕch jang pơ tăm ‘long tơ̆ dôm xăh: Đăk Hà, Ngọc Lây păng Hơ nih gru groa jơ hnơr arih kach mang kơ đông Anih jang Đảng dêh char Kon Tum tơ̆ xăh Măng Ri. Hơ drô̆ Khŭl vei lăng tĕch mơ dro kơ sô̆ 2 păng anih vei lăng tĕch mơ dro Kon Tum tơ gŭm apŭng 4.800 ‘long hơ drĕch ‘noh: hơ ngo, sơn tra, pơ kao anh đào, kơ sing tím păng boh mĭl mi.

Thuem: Tơ blơ̆