VOV4. Bahnar - Kơsơ̆ năr 24/1, tơ̆ pơlei tơm Kon Tum, Khŭl kơdră chĕp pơgơ̆r Dơnŏ anĭh Đảng dêh char Kon Tum pơgơ̆r Hop akŏm pơtôch tơdrong jang bơ̆ jang chĭh kơtơ̆ng ang sơnăm 2021 păng tơƀơ̆p mŭh măt 135 ‘nu bơngai tang măt ăn khŭl hŏk jrŭ, khŭl jŏh hơri, khŭl chĭh kơtơ̆ng ang sơnăm 2022.

Rup hop akŏ pơtôch bơ̆ jang kơtơ̆ng ang sơnăm 2021 păng tơƀơ̆p mŭh măt khŭl hŏk jrŭ, khŭl jŏh hơri, khŭl chĭh kơtơ̆ng ang sơnăm 2022

Nơ̆r hơlen đơ̆ng Ban Tuyên giáo Tỉnh ủy Kon Tum păng nơ̆r iung pơma đơ̆ng Bí thư Đảng dêh char Kon Tum Dương Văn Trang tơ̆ Hop akŏm đei ƀô̆h, sơnăm 2021 lơ̆m khei ‘năr đei jĭ hơbŭh Covid-19 pơrăm kơtang mă lei Kon Tum hlôi jang kĕ “ƀar tơdrong jang” mĭnh păh tang găn jĭ, mĭnh păh atŏk tơ iung mŭk drăm-tơpôl păng iŏk đei jơnei hơ iă. Iŏk đei jơnei lơ lau ‘nŏh đei tơdrong tơgop jơhngơ̆m đơ̆ng khŭl hŏk jrŭ, khŭl jŏh hơri păng khŭl chĭh kơtơ̆ng ang. Tơ̆ hop akŏm, Khŭl kơdră chĕp pơgơ̆r Dơnŏ anĭh Đảng dêh char Kon Tum hôn bơnê dôm tơdrong tơgop tơpăt đơ̆ng khŭl hŏk jrŭ, khŭl jŏh hơri, khŭl chĭh kơtơ̆ng ang lơ̆m pơ prŏ trong bơ̆ jang; tơƀô̆h tơbăt tơdrong oei sa ‘lơ̆ng hơ iă, jŏh ayŏ joăt joe sơ̆ ki rim hơdrĕch hơdrung dêh char Kon Tum.

Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Kon Tum Dương Văn Trang pơma dơnŭh hăm khŭl hŏk jrŭ, khŭl jŏh hơri, khŭl chĭh kơtơ̆ng ang

Kơdră chĕp pơgơ̆r dêh char Kon Tum athei rim hơnĭh jang pơjing rơvơn vă khŭl hŏk jrŭ, khŭl jŏh hơri, khul chih kơtơ̆ng ang iung jang kơtang tơdrong jang kơdĭh; ‘mĕh vă khŭl hŏk jrŭ, khŭl jŏh hơri, khŭl chĭh kơtơ̆ng ang hơnơ̆ng vang tơgop lơ hlŏh dơ̆ng lơ̆m tơdrong jang tơ iung pơjing păng atŏk tơ iung dêh char Kon Tum.

Tơblơ̆ nơ̆r: Amazưt