VOV4.Bahnar - Atŭm hăm bơ̆ jang hơmet ăn vă ‘măng pơlong lĕch ‘măng khoă jăl pêng sơnăm au đei pơgơ̆r sơđơ̆ng ‘lơ̆ng, rim hơnĭh bơ̆ jang tơ̆ dêh char Kon Tum hlôi đei trong vă jang tơgum djru dôm hŏk tro tơnap tap.

Khŭl gre bơbĭt hơdrŭh tơdăm Kon Tum tơgŭm hŏk tro lơ̆m ‘măng pơlong lĕch ‘măng khoă jăl pêng sơnăm 2021

Jô̆ trŭh dang ei, lơ̆m 4.700 ‘nu hŏk tro kơ dêh char Kon Tum vang pơlong lĕch ‘măng khoă jăl pêng sơnăm au, đei hlŏh 1.200 ‘nu hŏk tro đei hơnăn lơ̆m hla bơar chĭh đei sơng iŏk tơgŭm djru jô̆ hơtŏ mĭnh ‘nu ŏh đei 314.000 hlak jên. Kon jên tơgŭm ăn hŏk tro au kơ yuơ Dơnŏ anĭh vei lăng kon pơlei rim apŭng păng Khŭl Pơtrŭt hŏk pơhrăm pơlei tơm Kon Tum chă hơvơn. Rim hŏk tro đei tơgŭm djru ‘nŏh hŏk tro bơngai kon kông dăh mă dôm hŏk tro ŭnh hnam dơnŭh, mơti mơtĕk kơ 28 hnam trương lơ̆m dêh char. Atŭm hăm tơgum djru kon jên hu, hơdrol păng lơ̆m dôm năr pơgơ̆r pơlong lĕch ‘măng khoă jăl pêng, rim hơnĭh bơ̆ jang tơ̆ dêh char Kon Tum jei hlôi tơgŭm djru rim hok tro ŭnh hnam tơnap tap. Dơnŏ anĭh Đoàn dêh char tơbăt, hơdrŭh tơdăm Kon Tum hlôi đei trong jang hơdăh vă jang kiơ̆ tơdrong jang “Vang tơgŭm djru pơyan pơlong” tơ̆ 12 hơnĭh pơlong tơm păng 9 hơnĭh pơlong pơ prŏ ăn.

Tơblơ̆ nơ̆r: Amazưt