VOV4.Bahnar - Hăm hơnăn: “Tơgoăt kon pơlei pơla-Lang să iung jang ‘mêm mơnat”, pơgê năr 9/5, tơ̆ pơlei tơm Kon Tum, Khŭl chư pơglang ƀrê dêh char Kon Tum pơgơ̆r Pơm lê̆h iung jang Khei ‘mêm mơnat sơnăm 2022.

Pôk pơ ư tơpôl vang tơgop kơtang ăn tơdrong jang ‘mêm mơnat

Lơ̆m Khei ‘mêm mơnat sơnăm au, Khŭl Chư pơglang ƀrê dêh char Kon Tum hơdrin tơgŭm đơ̆ng 3.000 trŭh 5.000 ‘nu bơngai tơnap tap; Ming man 8 tŏ Hnam Chư pơglang ƀrê dăh mă ming man hơnĭh pơyua ăn tơpôl; Pơgơ̆r khăm, tơbăt jơhngơ̆m jăn, ƀơk pơgang ăn kon pơlei tơring tơnap tap. Khŭl chư pơglang ƀrê dêh char Kon Tum tơbăt, vă jang keh rim trong tơlĕch jang kơpal, Khŭl chư Pơglang ƀrê dêh char Kon Tum gô atŏk kơtang tơdrong tơgoăt tơgoăl kon pơlei pơla, lang să iung jang ‘mêm mơnat nhen hơnăn kơ khei ‘mêm mơnat sơnăm au. Lơ̆m năr Pơm lê̆h tơlĕch jang Khei ‘mêm mơnat sơnăm 2022, Khŭl chư Pơglang ƀrê dêh char Kon Tum hlôi sơng iŏk đei 140 trĭu hlak jên đơ̆ng rim khŭl păng rim bơngai chă tơgŭm ăn.

Tơblơ̆ nơ̆r: Amazưt