VOV4.Bahnar - Đơ̆ng rŏng kơ pơm hơ met 31km jăl trong gĭt kăl tơ̆ trong gre 24 kơ dâu klĕch dêh char Kon Tum ‘nao đang, ‘nŏh đei tơ drong lơ kon pơ lei oei xa 2 păh jih trong ƀŭ kơ lơ̆p tĕh ƀơm kơ nê̆ truh cham char bri brăh păng tơ drong vei sơ đơ̆ng tơ̆ trong gre, khul kơ dră pơ gơ̆r 2 apŭng Kon Plông păng Kon Rẫy, dêh char Kon Tum tơ ring đei trong gre 24 năm klĕch oei hơ tŏk tơ drong vei lăng, tang găn tơ drong ‘nâu.

Mĭnh anih kon pơ lei ƀŭ kơ lơ̆p tĕh vă pơm hnam tơ ter trong gre 24 jăl kơ dâu klĕch xăh Tân Lập, apŭng Kon Rẫy, dêh char Kon Tum

Khul kơ dră pơ gơ̆r 2 apŭng Kon Plông păng Kon Rẫy athei Dơ nŏ anih vei lăng kon pơ lei dôm xăh, thĭ trơ̆n đei trong gre kơ dâu klĕch hơ tŏk tơ drong vei lăng. Hăm dôm bơ ngai tơ găl, kăl đei chưk kơ lơ̆p tĕh yoa ƀơm ưh ‘lơ̆ng đơ̆ng tơ drong jang ming man adrol ki ‘nŏh khul kơ dră tơ ring pơ tho trong pơm hla ar păng ăn khul truh hơ len năng tơ drong ƀŭ kơ lơ̆p tĕh. Dơ nŏ anih vei lăng kon pơ lei apŭng Kon Rẫy khei ‘năr âu ki hlôi sek phak 2 ‘nu bơ ngai pơm glăi găh tĕh yoa ƀŭ kơ lơ̆p tĕh pơm ưh ‘lơ̆ng truh tơ̆ trong păng tĕh jŭm dăr.

Dơ̆ng: Tơ blơ̆