VOV4.Bahnar - Vă vei sơ đơ̆ng trong sơ năm lơ̆m pơ yan ‘mi tih sơ năm ‘nâu, dang ei anih jang vei lăng trong nơ năm, gre kơ dâu păng khŭl kơ dră chĕp kơ̆l 10 apŭng, pơ lei tơm kơ dêh char Kon Tum tŏk bŏk tŭn hrĕnh tơ drong hơ met ming dôm hơ nih teh hơ lih hlôi hơ met đei jên jang. Kŭm hăm ‘noh hơ tŏk loi dơ̆ng tơ drong jang dăr joang, dăr lăng, băt hơ dăh dôm hơ nih đei hơ mơt kơ đei ƀôh teh hơ lih tơ̆ dôm jăl trong vă hơ tâp kơ ƀang roi tơ băt ăn kon pơ lei băt vă tang găn.

Mĭnh hơ nih teh hơ lih kăl kơ jăh hơ met pơ ‘lơ̆ng tơ̆ apŭng Đăk Glei dêh char Kon Tum

Dôm anih jang, tơ ring kŭm kơ chăng pơ jing trong jang tơ jră, hơ met ăn tôm bơ̆n kơ măy kơ mŏk, bơ ngai jang vă bơ̆ jang dŏng tơ gŭm, dŏng sar bar păng hơ met pơ ‘lơ̆ng hiong răm mưh đei ‘mi tih đei ƀôh. Vă vei sơ đơ̆ng trong nơ năm lơ̆m dêh char, lăp hơ drol kơ pơ yan ‘mi tih sơ năm ‘nâu, anih jang găh trong nơ năm gre kơ dâu dêh char Kon Tum kŭm hlôi hơ met ăn vă jê̆ 300 tŏ bai tơ mo, dang 1.400m3 tơ mo, 1 trong gơng hơ neh păng 3 trong gơng pơ sey gô vă tơ lĕch jang hơ met pơ ‘lơ̆ng mưh đei hiong răm yua đơ̆ng ‘mi tih pơm ăn hăm dôm jăl trong nơ năm.

Thuem: Tơ blơ̆