Kơsơ̆ năr 21/10, Kŏng ang dêh char Đăk Lăk pơgơ̆r Hop akŏm xơkơ̆t dôm tơdrong jang tơbăt 60 xơnăm 'Năr juăt jue khul Kanh sat kon pơlei. Khei năr âu ki, Kŏng ang dêh char Đăk Lăk hlôi jang atŭm hăm Hô̆i Văn hŏk ngê̆ thươ̆t Đăk Lăk pơgơ̆r ăn kang ƀô̆ linh păng kon pơlei pơm kiơ̆ tơdrong pơlong kơyuơ Anih tơm Kŏng ang tơlĕch.

Pôk hơpăh ăn bơngai đei jơnei dôm tơdrong pơlong

Lơ̆m noh, đei 4 tơdrong pơlong tih noh: chih hơlen băt 60 xơnăm 'Năr juăt jue khul kanh sat kon pơlei; tơdrong pơlong chih hơlen găh um rŭp bơngai linh Kanh sat kon pơlei, tơdrong pơlong um ngê̆ thươ̆t păng video clip hăm hơnăn “Đe linh iŏk xơnong vei vêr tơdrong erih xơđơ̆ng” păng tơdrong pơlong Tang măt joh ayŏ đŏk lơ̆m Kŏng ang kon pơlei. Ƀơ̆t 'măng âu, Anih vei lăng kon pơlei dêh char Đăk Lăk hlôi pôk ƀăng hmach bơnê ăn 25 anih jang păng tơ 'ngla jang rơgei lơ̆m tơgŭm, pơgơ̆r Pơlong pơm kiơ̆ pơkăp, pơnăh phao, teh bioh. Anih tơm Kŏng ang pôk ƀăng hmach bơnê ăn dôm bơngai jang rơgei lơ̆m tơdrong Pơlong um rŭp ngê̆ thươ̆t păng video clip hăm hơnăn Đe linh iŏk xơnong vei vêr tơdrong erih xơđơ̆ng.