VOV4.Bahnar - Năr 15/11, Kŏng ang dêh char Đắk Nông hlôi pơgơ̆r Pơm lêh iung jang ‘măng iung jang kơtang hlŏh vă iung tơ jră phă pơrăm khŭl yoch, vei lăng sơđơ̆ng dơ̆ng kơ jăp lơ̆m khei ‘năr Tết Nguyên đán Qúy Mão 2023.

Kiơ̆ kơ ‘nŏh, đơ̆ng năr 15/11/2022 trŭh năr 5/2/2023, Kŏng ang dêh char Đắk Nông, đơ̆ng dêh char trŭh tơ̆ tơring gô chă hơvơn lơ khŭl jang, gre, iung jang kơtang rim tơdrong bơ̆ jang, băt hơdăh dôm tơdrong lơ̆m tơring, tơtom tơƀô̆h tơbăt ăn kơdră đảng, kơdră chĕp pơgơ̆r tơring, chă hơvơn pơđĭ khŭl jang chĭnh trĭ păng kon pơlei vang iung jang kơtang lơ̆m tang găn hơlâu, iung tơjră phă pơrăm, tơkêng tơbăt khul yoch, sar bar tơpôl, rim tơdrong pơm glăi khôi luơ̆t; xek tơlang keh đang rim tơdrong ư̆h sơđơ̆ng. Iung pơma tơ̆ jơ pơm lêh tơlĕch jang, Đại tá Bùi Quang Thanh, Kơdră chĕp pơgơ̆r Kŏng ang dêh char Đăk Nông athei khŭl kŏng ang lơ̆m dêh char atŏk kơtang jơhngơ̆m bơ̆ jang tơnăp, pơm kiơ̆ ƀlep tơdrong pơkăp, jang kiơ̆ ‘lơ̆ng trong bơ̆ jang vă phă pơrăm kĕ rim tơdrong pơm glăi kơtă tơ̆ tơring hloi.