Đơ̆ng rŏng hơmet tôm tơmam asong păng kơdŭng 'măn hla bar kiơ̆ lơ đak kơ-ang, Thiếu tá Lại Văn Đạt vơ̆r gre chơ nhôn năm truh pơlei pơla. Băt 'nhŏng oh năm hơdoi noh bơngai  Jarai, noh sư pơma hloi hăm nơ̆r kon kông tơ̆ tơring: " 'Năr ou, năm truh pơlei Ksing. 'Nou jĭ pơlei pơla hlôi tơguăt hăm tơdrong hơrih inh đơ̆ng oei 'lơ̆p sơ̆. Kon pơlei Jarai tơ̆ ou iơ̆m dim, băt chă tơgŭm dih băl; mă tơdrong hơrih kơ lơ unh hnam oei ƀơm lơ tơnap tap”.

Đei rơneh păng tih vơ̆ tơ̆ tơring teh ou, Thiếu tá Lại Văn Đạt hlôi hơrih xa hăm kon pơlei Jarai đơ̆ng oei 'lơ̆p. Lơ̆m tơdrong jang, hơnơ̆ng tơƀơ̆p, pơma dơnuh tơroi pơtho 'noh 'nhŏng pơtoi pơhrăm atăm, pơma nơ̆r Jarai lơ hloh.

Rim 'măng năm tơ̆ pơlei, Thiếu tá Đạt păng khul grŭp oei 'nhăk ba lơ tơmam pôk. Noh jing kơdŭng 'măn hla bar asong ăn đe hŏk tro đei tơdrong hơrih tơnap tap. Đơ̆ng tơdrong chă hơvơn 'nhŏng oh, bôl buăl păng Hơnih jang 'long pơglang Brê xah, 500 tŏ kơdŭng 'măn hla bar hlôi đei asong ăn đe oh hơdrol kơ sơnăm hŏk 'nao. Lơ̆m noh, đei mon  Ksor H’Yang tơ̆ pơlei Ksing pơti mĕ ƀă, oh hơrih hăm ƀok gah ƀă Siu Got:  “Inh tôch 'mêm kơ kang ƀô̆ Đạt. Sư jĭ bơngai 'lơ̆ng, ling lang chă tơgŭm ăn đe hơ-ioh đei tơdrong hơrih tơnap tap nhen kơdih kon môn kon sou po lơ̆m unh hnam. Hơdrol kơ mơ̆t hŏk sơnăm hŏk 'nao, unh hnam đe oh tơ̆ ou ƀơm lơ tơnap tap, mă lei gơnơm đei met Đạt tơgŭm ăn kơdŭng păng tơmam hŏk pơhrăm, nhôn đei tôm tơmam drăm hŏk pơhrăm”.

Đon băt đơ̆ng kon pơlei tơ̆ tơring hăm Thiếu tá Lại Văn Đạt ưh hơdrô̆ jing tơmam pôk, mă oei jing tơdrong tơguăt tơgŭm. Sơnăm 2021, lơ̆m 'măng năm jang ah khei năr pơrang COVID-19 hơbuh hli, Thiếu tá Đạt atŭm hăm khul pơm jang ƀôh minh 'nu drăkăn jê̆ rơneh nge. Ưh đei pơngơ̆t kiơ, 'nhŏng atŭm hăm khul jang 'nhăk bơngai drăkăn ou năm truh Hnam pơgang xah Phú Thiện. Mĕ kon sơđơ̆ng 'lơ̆ng, Thiếu tá Đạt krao hơnăn kon drăkăn noh Hạ Vy, hăm tơdrong hơpơi 'meh “tơjur pơrang cô-vít”. Amĭ Em, yă kơ hơ-ioh ou ăn tơbăt, sơnăm ou Hạ Vy hŏk lăm mâu yăo bơih, đei iŏk tơmam asong đơ̆ng kang ƀô̆ Đạt dơ̆ng: “Rim bơngai băt hơdah 'nhŏng Đạt hơdrol sơ̆ hlôi hơrih tơ̆ pơlei ou păng jĭ kon kơ amĭ Biên. Rim 'măng vih ngôi tơ̆ pơlei, 'nhŏng hơnơ̆ng 'nhăk ba tơmam drăm hŏk pơhrăm ăn đe hơ-ioh. Lơ̆m đe hơ-ioh đei tơgŭm noh đei mon Hạ Vy. 'Nou jĭ minh tơdrong jang kăp gĭt păng trŏ khei năr. Truh dang ei, 'nhŏng oei pơtoi pơm jang lơ tơdrong chă tơgŭm tơmam hŏk pơhrăn ăn kơ đe mon"

Đơ̆ng tơdrong chă vih ngôi tơ̆ pơlei, Thiếu tá Lại Văn Đạt pơjing kênh Facebook “Công an về làng”, chih răk um rup đe kang ƀô̆ linh vih tơ̆ pơlei pơla, pơma dơnuh hăm kon pơlei, chă hơlen băt gah tơdrong hơrih păng tơgŭm kon pơlei. Lơ̆m 3 giĕng, jê̆ 60 clip đei tơbang, đei jê̆ 9.000 bơngai lăng. Minh ƀar đei jê̆ 500 rơbou bơngai lăng. Thiếu tá Lại Văn Đạt akhan, um rup bơngai kŏng ang tŏk bŏk oei tơjê̆ hăm kon pơlei, atŭm hơrih xa hăm kon pơlei, pơma nơ̆r kon pơlei, tơmơ̆ng kon pơlei tơroi păng vang glơng tơnap tap hăm kon pơlei:  “Khul Kŏng ang nhôn 'noh đei “6 Tơdrong Ƀok Hô pơtho Kŏng ang kon pơlei”. Lơ̆m noh, athei nhôn ling lang kŭp jom kơ kon pơlei, ling lang tơguăt kơjăp hăm Đảng, Teh đak; hăm kon pơlei, nhôn athei băt chu yom. 'Noi jing minh tơdrong jang hơdah kiơ̆ nơ̆r Ƀok Hô pơtho, kŭm nhen tơdrong pơlong “Pêng hloh” đơ̆ng Hơnih tơm Kŏng ang, lơ̆m noh đei “tơjê̆ kon pơlei hloh”.

Yak hơdoi hăm tơdrong jang “Kŏng ang vih tơ̆ pơlei” đei hơdruh Jarai Rah Lan Wĩ, tơ̆ Plei Kte Lớn A, xah Phú Thiện, dêh char Gia Lai. Jĭ minh lơ̆m dôm bơngai pơjing đei lơ bơngai lăng "triu view" đơ̆ng pơlei pơla, Rah Lan Wĩ hlôi tơgŭm Lại Văn Đạt phĭn iŏk dôm um rup kơ tơdrong hơrih tơpă:  “ 'Nhŏng Đạt 'noh kang ƀô̆ Kŏng ang kon pơlei, ling lang tơguăt hăm kon pơlei, chă tơroi tơbăt kon pơlei jang kiơ̆ tơchơ̆t tơlĕch đơ̆ng Đảng păng Teh đak. Lơ̆m tơdrong jang 'noh, 'nhŏng Đạt tơgĕch pơma nơ̆r Jarai hăm inh hăm kon pơlei gơh trŏ hloh. Rim 'măng vih tơ̆ pơlei, kon pơlei 'mêm kơ 'nhŏng Đạt dêh; năm truh tơ̆ yơ, kon pơlei kŭm pĕ hla ƀlang asong ăn. Gơnơm đei tơdrong adrin hŏk nơ̆r Jarai noh 'nhŏng Đạt hlôh vao tôm gah tơdrong mă kon pơlei hơpơi 'meh đei”.

Đơ̆ng tơdrong jang ƀônh ƀŏ, tơguăt hăm kon pơlei, Thiếu tá Lại Văn Đạt păng khul grŭp Kong ang xah Phú Thiện, dêh char Gia Lai tŏk bŏk oei jang hơdah kiơ̆ nơ̆r Ƀok Hô pơtho Kŏng ang kon pơlei: kŭp jom, phep ngua hăm kon pơlei, tơguăt kơjăp hăm kon pơlei. Hŏk nơ̆r kon pơlei, vih hăm pơlei pơla, tơmơ̆ng păng vang glơng rim tơdrong hăm kon pơlei, vă um rup bơngai linh Kŏng ang roi năr roi tơjê̆, hlôh vao kon pơlei păng pơm jang kơyuơ kon pơlei.