Tơring Tây Nguyên hlôi yak truh pơyan ‘mi. Tơ̆ hơnih ming man Hnam trương teh đak rong ‘me tơ̆ tơring sơlam teh đak Thuận An, dêh char Lâm Đồng, jơ ‘năr jang tok bŏk tơlĕch kơtang. Ƀok Nguyễn Thành Long, Bơngai chĕp kơ̆l ming man tơbăt, dang ei đei 270 ‘nu kŏng nhân, kih sư atŭm hăm hloh 20 tong gre, kmăi kmŏk đei pơjing lơ khul tĕnh koăng iung jang pơ̆ng pơbŭng, man tơnăr. Mă đơ̆ng tơjră muh măt hăm tơdrong ưh kơ gan đei bơngai jang, kơjă tơmam drăm tŏk măt đơ̆ng 20-30%, bơngai tơmơ̆t jên jang oei iung jang hơnơ̆ng tôm bơngai jang, sơđơ̆ng tơmam drăm ming man vă sơđơ̆ng ăn ming man, hơdrin jang ming man keh đang ƀlep jơ ‘năr pơkă.“ ‘Năr ‘mi ‘noh nhôn ăn chă băh tơnăr, man ma-tít păng sơng găh lăm hnam; găh dôm ‘năr prăng ‘noh ăn ming man găh ‘ngoăih, pơ̆ng pơbŭng vă keh đang ƀlep trong tơlĕch jang. Mă hơdăh, hnam S1 hlôi ming man keh đang 70%, S7 hlôi man đang păng năr blŭng giĕng kơnh gô pơ̆ng pơbŭng, găh S10 tŏk bŏk man pơ keh tăl 2, 3; hơdrô̆ găh dur hlôi man đang. Nhôn tŏk bŏk hơdrin truh năr 30/7 kơnh gô ming man keh đang păng pơjao ăn hnam trương ou.”

Ƀok Hà Sỹ Sơn, Kơdră Hơnih chĕp pơgơ̆r vei lăng tơdrong vă jang Tơmơ̆t jên jang păng Ming man kơsô̆ 3 dêh char Lâm Đồng, tơ-‘ngla tơmơ̆t jên jang tơbăt, lơ̆m dêh char đei 5 hnam trương teh đak rong ‘me. Lơ̆m ou đei ƀar hnam trương tơ̆ tơring sơlam teh đak Thuận An păng Quảng Trực iung jang ming man lơ̆m hơtuch sơnăm 2025 tŏk bŏk akŏm lơ bơngai jang, ming man “3 hơyuh, 4 khul” vă sơđơ̆ng jăh keh đang. Tơ̆ hơnăp tơdrong kơjă tơmam drăm ming man tŏk măt, bơngai jang ming man hui kơ đei, ‘năr tơplih kơtang, Hơnih vei lăng hlôi iung jang hơlen hơnih jang keh đang kiơ̆ kơ khei, đei ‘măng kiơ̆ kơ giĕng, adoi hơmet ming kơjă vă kla ăn kon jên ăn bơngai iŏk jang ming man, hơdrin jang keh đang ming man lơ̆m năr 30/7.“Hơnih vei lăng tơdrong vă jang atŭm hăm rim hơnih iŏk ming man pơjing hla bơar pơkăp ming man keh đang tôch hơdăh vă dăr lăng rim năr, rim giĕng vă tơchă rim trong iung jang keh đang tĕnh koăng, hơdrin jang keh đang ƀlep trong tơlĕch ăn. Hăm rim kmăi kmŏk pơ yoa ăn pơtho hok pơhrăm atŭm hăm kmăi kmŏk anai, nhôn hlôi kĭ pơkăp răt iŏk đơ̆ng rim hơnih tĕch mơdro; đe sư jei tŏk bŏk kơrŭn jơhngơ̆m pơm tơlĕch, răt tơmơ̆t đơ̆ng teh đak đe găh kmăi kmŏk vă mưh tơdrong ming man hnam trương keh đang ‘noh iung jang chă pơlăp bơ̆n kmăi kmŏk hloi. Trong tơlĕch ăn ‘noh dôm tơdrong jang keh đang hơdrol khei ‘năr mơ̆t hŏk lơ̆m sơnăm ‘nao.”

Atŭm hăm rim hơnih tŏk bŏk kơrŭn jơhngơ̆m iung jang ming man kơtang, bơ̆ jang hơmet ăn khul bơ̆ jang păng krao tơmơ̆t hŏk đei tơlĕch jang kơtang. Vă sơđơng ăn tơdrong jang pơtho hŏk pơhrăm hơ iă, Hơnih vei lăng Hnam trương pơtho pơhrăm dêh char Lâm Đồng iung jang hơdoi hăm rim tơring proh hơmet ƀok thây kô. Adoi rim tơring jei iung jang ‘lơ̆ng tơdrong krao tơmơ̆t hŏk ƀlep hăm trong tơlĕch ăn, ƀlep bơngai păng pơjing trong jang krao hơmơ̆t dôm bơngai bơ̆ jang vei lăng, pơvih pơvăn mưh đei Hơnih vei lăng kon pơlei dêh char Lâm Đồng kĭ tơchơ̆t tơlĕch jang.

Ƀok Hồ Sĩ Hải, Kơdră Hơnih jang vei lăng Oei sa Joh ayŏ-Tơpôl tơring Quảng Trực tơbăt, hnam trương teh đak rong ‘me tơ̆ tơring mưh keh đang gô sơng đei dang 900 ‘nu hŏk tro, hăm 18 lăm jăl kơđeh păng 12 lăm jăl ƀar. Dang ei tơring hlôi tơmơ̆t 32 ‘nu ƀok thây kô pơtho ƀiên chê̆; 19 ‘nu ƀok thây kô pơtho kĭ pơkăp kiơ̆ kơ bruh, atŭm hăm hloh 10 ‘nu bơngai bơ̆ jang vei lăng, pơvih pơvăn, kih thuơ̆t ... gô đei krao tơmơ̆t lơ̆m khei năr kơnh.“Vă proh hơmet tôm hok tro đei tôm rơvơn mơ̆t hŏk lơ̆m hnam trương teh đak rong ‘me, nhôn iung jang bơ̆ jang krao tơmơ̆t kiơ̆ trong pơm kơphĭu dăr lăng hơlen pơtruh ăn rim ŭnh hnam đei kon hơ ‘lơ̆p tôm sơnăm mơ̆t hŏk, tŏk bŏk hok pơhrăm tơ̆ rim hnam trương lơ̆m tơring. ‘Moi kiơ̆ trong tơlĕch ou, tơdăh ‘meh vă, rim đe oh gô mơ̆t hŏk lơ̆m hnam trương teh đak rong ‘me. Nhôn ‘moi kiơ̆ rim tơdrong tơchơ̆t vă rơih ƀlep bơngai. Dang ei hlôi đei hloh 90% ‘nu mĕ ƀă hok tro đei tôm rơvơn pơtruh ăn kơphĭu dăr lăng hơlen, ‘meh vă ăn kon hơ ‘lơ̆p mơ̆t hŏk lơ̆m hnam trương teh đak rong ‘me.”

Đơ̆ng trong bơ̆ jang ‘lơ̆ng hơ iă đơ̆ng Đảng, Teh đak atŭm hăm tơdrong hơdrin đơ̆ng tơngla tơmơ̆t jên jang, hơnih iŏk ming man păng tơring, dang 1.800 ‘nu hok tro tơring sơlam teh đak dêh char Lâm Đồng gô hrôih đei hŏk pơhrăm, oei sa lơ̆m dôm pơbŭng hnam trương ‘lơ̆ng liĕm, đei tôm kmăi kmŏk tơmam drăm. Dôm pơbŭng hnam trương ‘nao ưh khan lăp chông ba tơdrong hơpơi ‘meh vă đơ̆ng đe hŏk tro tơring sơlam teh đak, mă oei tơgop pơtho pơjing khul jang ăn hơnô̆ hơnăp kơnh, vang tơ iung pơjing tơring sơlam teh đak Lâm Đồng roi năr roi pơdrŏng ‘lơ̆ng liĕm, gơh hơgei, gei kơjăp iăp kơtang tơ̆ tơring sơlam kơ Teh đak.