Ơ kon pơlei pơla, đông chĭ păng ƀô̆ đô̆i kŏng ang lơ̆m tĕh đak!

Lơ̆m jơ ‘năr gĭt kăl hlŏh sơng kơ kuh sơnăm ‘nah Nhâm Dần, ĭnh tang măt ăn kơdră chĕp pơgơ̆r Đảng, Tĕh đak păng Dơnŏ anĭh Trung ương Mặt trận Tổ quốc Việt Nam, apĭnh pơtrŭh nơ̆r ƀơ̆r đon ăn kon pơlei pơla, đông chĭ, ƀô̆ đô̆i kŏng ang lơ̆m tĕh đak atŭm hăm kon pơlei bơ̆n oei tơ̆ tĕh đak đe ‘ngoăih jơhngơ̆m đon ‘mêm kơ eng, nơ̆r hmach sơnăm ‘nao chơt hơ iă ‘nă hal hlŏh. Ĭnh jei apĭnh pơtruh nơ̆r ăn bôl boăl jơ̆p lơ̆m plei tĕh, kon pơlei rim tĕh đak lơ̆m apŭng plĕnh tĕh nơ̆r hmach ăn rơngei keh kong, tơgoăt tơgoăl, pơdrŏng păng hơnŭk hơnoa.

Hơdơ̆r dơ̆ng pơyan puih mak Nhâm Ngọ 1942, lơ̆m ƀăo “Việt Nam Độc Lập”, Kơdră chĕp pơgơ̆r tĕh đak Hồ Chí Minh hlôi chĭh:

Hmach ăn pơđĭ lơ̆m tĕh đak bơ̆n sơnăm au

Hla kơ ƀrê đei sơnglŏng păr mơ liơk

Sơnăm au jing sơnăm Têt chơt hơ iă ‘nă hal

Nơ̆r hmach đơ̆ng Ƀok Hô dang ei hlôi trŭh 80 sơnăm. Mă đơ̆ng chăl sơnăm hlôi yak trŭh chăl ‘nao, mă lei dôm tơdrong ‘lơ̆ng đei vei răk đơ̆ng chăl sơnăm kơ hơdrĕch hơdrung, jơhngơ̆m đon tơgoăt tơgoăl kơ jăp, jơhngơ̆mn đon ‘mêm mơnat, jơhngơ̆m pran hơnơ̆ng, đĭ mĭnh jơhngơ̆m đon đơ̆ng kon pơlei bơ̆n oei hơnơ̆ng ư̆h tơplĭh.

Sơnăm 2021, lơ̆m khei ‘năr long, bơ̆n hlôi ƀô̆h hơdăh lơ um rup ‘lơ̆ng, dôm bơngai plang akau kơ yuơ tơdrong ƀlep, plang jơhngơ̆m jăn, mŭk drăm kơ yuơ tơpôl tơ̆ rim răih kon pơlei: ‘Nŏh rim ƀok thây pơgang, ƀô̆ đô̆i, kŏng ang, dôm bơngai năm iung jang ư̆h kơ ‘nhoen, ư̆h kơ hli tơdrong hơmơt tơt kơ jĭ hơbŭh, hơchăng hŭt tơ̆ rŏng unh hnam, mĕ ƀă kră, kon hơ ‘lơp; ‘nŏh dôm đe ƀok yă kră iŏk pơ đĭ kon jên mong răk kơ dĭh vă tơgŭm ăn hơnĭh mong jên tang găn jĭ hơbŭh Covid-19; ‘noh rim đe hơdrŭh tơdăm păh kơchong, đe hơ iŏh hlôi chĭh đei rup tôch kơ ‘lơ̆ng, lơ nơ̆r pơđơ̆ hơ iă, hla kơ thơ măh chhưu lơ̆m jơhngơ̆m, tơbăt jơhngơ̆m đon hơpơi ‘mĕh vă, ‘mêm kơ eng hôn bơnê hăm rim ƀok thây pơgang, adoi nhen jơhngơ̆m đon lui kiơ̆ kơ jăp găh jơhngơ̆m đon pran Việt Nam lơ̆m tơdrong long jĭ hơbŭh …

Lơ̆m jơ ‘năr au, đei dôm kon hơ ‘lơ̆p Việt Nam tŏk bŏk iung jang tang găn jĭ hơbŭh; rim ƀô̆ đô̆i kŏng ang au prăt măng prăt năr vei lăng sơđơ̆ng, vei lăng sơlam tĕh đak, tơring chon dơsĭ dăh mă rim ‘nhŏng pơmai ŏh oei tơ̆ lơ hơnĭh bơ̆ jang hơnơ̆ng hơngŭl hăm tơdrong jang, ư̆h kơ gơ̆h vă vang sơng Têt atŭm hăm ŭnh hnam.

Đảng, Tĕh đak păng kon pơlei hôn bơnê kơtang dôm tơdrong hơdrin iung jang kơ yuơ kon pơlei păng tơpôl. Tĕh đak ƀlŏk hơdơ̆r dôm tơdrong hơdrin đơ̆ng kon pơlei, bôl boăl plang jơhngơ̆m jăn ăn kơ Tĕh đak đơ̆ng kon pơlei bơ̆n oei tơ̆ tĕh đak đe păng tơdrong tơgŭm djru đơ̆ng bôl boăl apŭng plĕnh tĕh.

Đơ̆ng tơdrong long sa roi pơm ăn kơ bơ̆n đei jơhngơ̆m pran hlŏh dơ̆ng kơ jơhngơ̆m đon tơgoăt tơgoăl, hơdrin păng iung jang kơ jăp, tơgăl hăm jơhngơ̆m đon nuih mơng kơ mĕ ƀă yă ƀok bơ̆n lơ̆m prăt chăl sơnăm “Pơgê tang găn kial hơbŭt đak rơnglă, kơsơ̆ tang găn tŏ ŭnh chhông”, yak hloh rơbau sơnăm plang ăn, tơ iung pơjing păng vei lăng Tĕh đak.

Apĭnh hmach ăn rim ŭnh hnam Việt Nam ‘mêm kơ eng đei dôm năr Têt chơt hơ iă ‘nă hal, hơnŭk hơnoa păng sơđơ̆ng. Apĭnh hmach ăn rim răih kon pơlei Việt Nam, kon pơlei bơ̆n oei tơ̆ tĕh đak đe sơnăm ‘nao Nhâm Dần 2022 pran jăng grăng akau, jơnei păng hơnŭk hơnoa.

Bơnê lơ păng Hmach sơnăm ‘nao ‘lơ̆ng rŏ hơbŏ nhen!

Kơdră chĕp pơgơ̆r Tĕh đak Nguyễn Xuân Phúc

Tơblơ̆ nơ̆r: Amazưt