VOV4.Bahnar - Yoa ưh đei hơ met hơ nơ̆ng, đa đei ‘mi tih đak lŏk tơ jroh dơ̆ng kơ na lơ trong tơ̆ tơ ring groi kông kơ dêh char Kon Tum hrei ‘nâu oei hơ mơt tôch dêh. Kŭm hăm tơ drong krê kơ gre tâm prĕh băl, tơ dăh ưh đei hơ met hrôih, tơ drong krê tĕh hơ lih găn trong, jing ưh gơ̆h năm truh tơ̆ dôm tơ ring kon pơ lei oei xa lơ̆m pơ yan ‘mi kial sơ năm ‘nâu hơ nat vă gơ̆h vĕh ver.

Đơ̆ng plei Đăk Ga truh tơ̆ tŏk bŏk xăh sơ lam Đăk Nhoong, apŭng Đăk Glei,  lăp dang 3km. Adrol sơ̆ trong ‘nâu kŭm đei man hăm bê tông mă lei yoa đunh ưh đei hơ met ming kơ na măt trong đĭ pơ chăh, đei pŭng lŭng bơih. Đĭ thoi nŏh bơih tĕh tơ̆ âu krang dơ̆ng kơ na 2 păh jih trong đei lơ hơ nih tĕh hơ lih. ‘Nhŏng A Cu, ƀok pơ gơ̆r plei Đăk Ga tơ roi, tơ drong yak vih vât đơ̆ng 108 unh hnam tơ̆ plei Đăk Ga hơ nơ̆ng tơ jră hăm tơ drong krê: “Trong đơ̆ng plei Đăk Ga năm tơ̆ xăh Đăk Nhoong tôch mơ mat, lơ̆m pơ yan ‘mi đa đei tĕh hơ lih găn trong. Tôch hơ mơt mă loi hăm đe hơ iŏh năm hŏk tơ dăh đei tĕh hơ lih lei tôch krê”.

Mĭnh anih tĕh hơ lih păih thong tơ̆ xăh Đăk Nhoong trong năm tơ̆ apŭng Đăk Glei

Trong apŭng ĐH83 kơ jung dang 12km đơ̆ng xăh sơ lam Đăk Nhoong năm tơ̆ tŏk bŏk apŭng Đăk Glei kŭm thoi nŏh mơ̆n. Adrol sơ̆ trong ‘nâu đei pơm hăm yâu hăk, mă lei đơ̆ng rŏng lơ sơ năm ưh đei hơ met ming kơ na trong hư pơ chăh, jing đei lơ pŭng lŭng. Krê hlŏh jĭ tơ̆ jih trong đei tĕh hơ lih. Lơ anih tĕh hơ len roi hlom tơ̆ trong, oei 1 păh ‘nŏh thong tôch jrŭ. Ƀok A Nang, Phó Bí thư Đảng, Kơ dră Jơ nŭm pơ gơ̆r kon pơ lei xăh Đăk Nhoong ăn tơ băt, khul kơ dră pơ gơ̆r tơ ring păng kon pơ lei hơ nơ̆ng đei đon pơ ngơ̆t, hơ met gre tâm preh băl păng hơ mơt tĕh hơ lih găn trong mât tơ̆ xăh, lơ̆m pơ yan ‘mi truh: “Tơ dăh đei ‘mi tih 2,3 ‘măng ưh jor gô đei tĕh hơ lih găn trong. Lơ anih đei truh 2 ƀôt tĕh hơ lih. Tơ ter thong tĕh hơ lih vă đĭ trong hloi. Nhôn lăp chă hơ tâp kơ ƀang, chih tơ băt chư vă kon pơ lei huei yak kiơ̆ trong ‘nŏh đĕch. Đunh đai kơnh athei hơ met pơ ‘lơ̆ng dôm anih đei tĕh hơ lih âu”.

Tĕh hơ lih xa roi hlom tơ̆ măt trong

Apŭng sơ lam Đăk Glei, dêh char Kon Tum dang ei đei 70 km trong apŭng, 51 km trong pơ lei pơ la, trong năm tơ̆ mir, năm tơ̆ chŭn. ‘Ngoăih kơ trong apŭng ĐH 84 ‘nao đei tơ lĕch jên pơm hơ met, vă rim jăl trong nai đĭ hư ngăl bơih. Tơ drong tơm ‘nŏh yoa trong pơm đunh ngăl bơih, ưh đei hơ met ming hơ nơ̆ng, đa đei ‘mi tih đak lŏk tơ jrŏh, tĕh hơ lih hai, pơm ăn tơ drong yak vih vât, mă loi tơ drong chơ chuĕn tơ mam đơ̆ng choh jang xa đei kơ kon pơ lei tơ ƀâp lơ mơ mat tat. Pơ yan ‘mi sơ năm ‘nâu, lơ xăh kơ apŭng Đăk Glei, nhen: Đăk Nhoong, Đăk Blô, Mường Hoong, Ngọc Linh… oei dơ̆ng tơ̆ hơ năp tơ drong krê tĕh hơ lih găn trong mât tơ̆ dôm pơ lei ngăl.

Kiơ̆ Anih vei lăng mŭk drăm păng trong nơ năm apŭng Đăk Glei, dêh char Kon Tum, tơ̆ hơ năp dang ei, anih oei hơ met jên vă pơm hơ met trong, ƀât dôm anih hư pơ chăh tơ̆ trong yoa apŭng vei lăng vă pơm ‘lơ̆ng ăn tơ drong yak vih vât adrol, lơ̆m păng đơ̆ng rŏng kơ ‘mi kial. Găh đunh ning mônh kơnh anih nhôn vă apinh dêh char păng Trung ương tơ lĕch jên vă jăh pơm hơ met trong mă kơ jăp ‘lơ̆ng, hăm dôm tŏ trong yak tơm lơ̆m tơ ring.

                                                                                                                                                Khoa Điềm: Chih

Dơ̆ng: Tơ blơ̆