VOV4.Bahnar - Hơ nơ̆ng bơ̆ jang lơ̆m hop akŏm mă 3, pơ gê 14/6, Kuô̆k hô̆i hlôi drơ̆ng nơ̆r ăn Luơ̆t Kanh sat kơ đŏng păng Tơ drong tơ chơ̆t găh pơ jing Khul dăr hơ len kiơ̆ tơ drong jang kơ Kuô̆k hô̆i sơ năm 2023.

Hăm 91,16% kơ phĭu đơ̆ng bơ ngai tang măt Kuô̆k hô̆i đei măt drơ̆ng nơ̆r, Kuô̆k hô̆i hlôi drơ̆ng nơ̆r ăn Luơ̆t Kanh sat kơ đŏng. Luơ̆t âu đei 5 chăl, 33 apăng, chih hơ dăh: Kanh sat kơ đŏng jĭ khul linh tơ blăh kơ kon pơ lei găh Khul linh Công an kon pơ lei Việt Nam, jĭ khul linh tơm dơ nơm bơ̆ jang iung tơ blăh vei lăng sơ đơ̆ng tĕh đak, vei lăng sơ đơ̆ng tơ pôl.

Luơ̆t chih hơ dăh dôm tơ drong kâm jang, lơ̆m nŏh kâm tơ jră plơ̆, tang găn tơ drong bơ̆ jang đơ̆ng Kanh sat kơ đŏng. Kâm ăn ôn jên dăh mă pơ gŏ kăn ƀô̆, linh kanh sat kơ đŏng bơ̆ jang glăi hơ năp jang, tơ drong jang đei pơ jao. Luơ̆t oei chih hơ dăh, kăn ƀô̆, linh Kanh sat kơ đŏng năng kăl păng vei lăng ‘lơ̆ng tơ drong đei yoa trŏ luơ̆t kơ anih jang, khul grŭp, rim bơ ngai; jang hơ doi kơ jăp hăm kon pơ lei, lui yom, đĭ jơ hngâm pơ vih ăn kon pơ lei. Kơ tang nuih mơng, kơ chăng tơ blăh, jang ‘lơ̆ng rim tơ drong đei pơ jao.

Dơ̆ng: Tơ blơ̆