'Măng hop akŏm âu gô akŏm hơlen, sek tơlang dôm tơdrong pơm jang tam mă keh đang lơ̆m sơnăm 2024; atŭm hăm noh tơchơ̆t tơdrong jang păng tơdrong tơbôl kơ Anih jang Kơpal kơ Kuôk hô̆i sơnăm 2025 păng hơlen, tơchơ̆t minh ƀar tơdrong nai kiơ̆ tơdrong pơgơ̆r po. Pơma ah pơtơm hop akŏm, Kơdră Kuôk hô̆i Trần Thanh Mẫn ăn tơbăt, lơ̆m 2 năr hop akŏm, Anih jang Kơpal kơ Kuôk hô̆i gô akŏm hơlen tơdrong hơkŏp hơlen hơdah ah 'măng hop akŏm mă 8, Kuôk hô̆i jăl 15 păng tơdrong chih akŏm luơ̆t kiơ̆ pơkăp jang kơ Anih jang Kơpal kơ Kuôk hô̆i  sơnăm 2025, tơgop nơ̆r mă blŭng gah hơmet ăn 'măng hopa kŏm mă 9 kơ Kuôk hô̆i.

Kiơ̆ kơ noh, Kuôk hô̆i gô hop akŏm ưh kiơ̆ pơkăp ah hơtuch khei 2/2025 vă hơmet dôm luơ̆t đei tơrĕk truh jơnŭm pơgơ̆r jang kơ Kuôk hô̆i, luơ̆t Jơnŭm jang kơ Jơnŭm pơgơ̆r teh đak, luơ̆t Jơnŭm jang kơ jơnŭm pơgơ̆r tơring. Anih jang Kơpal kơ Kuôk hô̆i  adoi tơgop nơ̆r hăm 7 tơdrong gah jên hu, jên mong. Kơdră Kuôk hô̆i Trần Thanh Mẫn adoi pơgơ̆r dah tenh kuăng keh đang dôm tơdrong chih hơmet luơ̆t vă tơplih 'nao, sơkơ̆t jơnŭm pơgơ̆r jang gơh bot 'lơ̆ng, pơm jang đei jơnei tơnăp.