VOV4.Bahnar - Lơ̆m 2 năr, năr ‘nâu (1/6) păng ‘năr dơ ning (2/6), Kuôk hô̆i pơ ma dơ nuh tơ̆ hnam hop akŏm tơm găh hơ len lăng tơ mơ̆t dơ̆ng pơ tôch bơ̆ jang kiơ̆ trong tơ lĕch jang hơ tŏk tơ iung mŭk drăm - tơ pôl păng jên jang teh đak sơ năm 2021; tơ drong bơ̆ jang kiơ̆ trong tơ lĕch jang hơ tŏk tơ iung mŭk drăm - tơ pôl păng jên jang teh đak dôm khei blŭng sơ năm 2022; pơ tôch tơ drong bơ̆ jang kiơ̆ tơ drong tơ chơ̆t kơ sô̆ 42 đơ̆ng Kuôk hô̆i găh pơ long lăng hơ met pơ ‘lơ̆ng hre kơ nê̆ đơ̆ng dôm anih jang asong tŏk iŏk jên. Tơ̆ ‘măng pơ gơ̆r blŭng a ‘măng hop akŏm Kuôk hô̆i, Phŏ Thủ tướng teh đak Lê Văn Thành tơ roi tơ băt hơ dăh: Khŭl kơ dră teh đak tơ lĕch ăn 12 grŭp trong jang, lơ̆m noh lăng kăl truh akŏm vei lăng jĭ COVID-19 păng tơ iung ming hrĕnh, hơ tŏk tơ iung mŭk drăm tơ pôl kơ jăp. Tơ lĕch jang dôm tơ drong tơ chơ̆t đơ̆ng Hop akŏm Trung ương 5 (jăl 13), mă loi ‘noh jĭ tơ drong teh, mŭk drăm tơ pôl, choh jang sa, kon pơ lei jang chŭn mir păng tơ ring tơ rang, tơ tĕnh chih pơ keh, pơ truh ăn Kuôk hô̆i hơ met ming Luơ̆t teh sơ năm 2013. Khŭl kơ dră teh đak kŭm sơ kơ̆t hơ dăh tơ lĕch jang kơ tang dôm trong jang pơ trŭt tơ lĕch jên tơ mơ̆t jên jang teh đak; hơ dai hăm hơ tŏk loi dơ̆ng tơ drong kĕ jang đơ̆ng khŭl jang pơ gang. Pơ gơ̆r ‘lơ̆ng ‘măng pơ long tôt ngiêp jăl 3 păng rơ̆ih hŏk tro mơ̆t hŏk đăi hŏk, kao đăng sơ năm 2022.

Thuem: Tơ blơ̆