VOV4.Bahnar - Kiơ̆ tơdrong pơgơ̆r hop akŏm mă 3, Kuô̆k hô̆i jăl XV, năr au, năr 31/5 Kuô̆k hô̆i bơ̆ jang tơ̆ Hnam hop akŏm păng tơ̆ khŭl pơma dơnŭh găh tơdrong vă pơjing mĭnh ƀar Khôi luơ̆t gĭt kăl. Lơ̆m jơ bơ̆ jang tĭl pơgê, Kuô̆k hô̆i mơ̆ng Kơdră jang lơ̆m Dơnŏ anĭh chĕp pơgơ̆r Kuô̆k hô̆i, Kơdră chĕp pơgơ̆r Dơnŏ anĭh bơ̆ jang Khôi luơ̆t kơ Kuô̆k hô̆i Hoàng Thanh Tùng đŏk Hla bơar tơl hơdăh, tơgoăt iŏk, hơmet ming tơdrong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Pơm tơngla Trong tơdrong tơchăr hơgei. Kiơ̆ đơ̆ng rŏng ‘nŏh, Kuô̆k hô̆i pơma dơnŭh tơ̆ hnam hop akŏm găh mĭnh ƀar tơdrong oei đei nơ̆r tơgop phara dĭh băl kơ tơdrong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t pơm tơngla Tơdrong tơchăr hơgei. Đơ̆ng rŏng ‘nŏh, hơnĭh bơ̆ jang pơtrŭh ăn păng hơnĭh bơ̆ jang pơm tơm chĕp pơgơ̆r dăr lăng iung jang hơdoi tơl hơdăh, pơm hơdăh dôm tơdrong mă kơdră tang măt Kuô̆k hô̆i pơma. ‘Măng hop akŏm tơ̆ kơ sơ̆, Kuô̆k hô̆i pơma dơnŭh tơ̆ khŭl găh Tơdrong vă jang Khôi luơ̆t tang găn hil hơrĕh tĕh dong lơ̆m ŭnh hnam (hơmet ming) păng Tơdrong vă jang Khôi luơ̆t Jang kiơ̆ hơtŏ hơnơ̆ng tơ̆ tơring.

Tơblơ̆ nơ̆r: Amazưt