VOV4.Bahnar - Hơnơ̆ng ‘măng hop akŏm mă 3, Kuô̆k hô̆i jăl 15; pơgê brei, năr 3/6, pơma dơnŭh tơ̆ hnam hop akŏm găh tơdrong vă pơjing Tơdrong tơchơ̆t găh jang pơlong năng bơ̆ jang tơdrong jang, pơjing tơdrong jang, pơtho tơdrong jang ăn bơngai pơnă oei tơ̆ ‘ngoăih hnam pơnă, rim kơdră tang măt akhan Tơdrong tơchơ̆t ‘nŏh trong jang kăl hlŏh tơgŭm ăn bơngai pơnă đei tơdrong jang gơ̆h hơgei, tơchă đei tơdrong jang mư̆h lĕch đơ̆ng hnam pơnă, vă “Trong brŏk tơ̆ hnam kơ bơngai pơnă jăl hlŏh”, tơgŭm ăn dôm bơngai bơ̆h ƀơm pơm tơdrong glăi đei vĭh erĭh sa ‘lơ̆ng hơ iă hiôk hian hlŏh ƀiơ̆. Rim kơdră tang măt athei Khŭl kơdră tĕh đak tơchơ̆t hơdăh trong pơkăp, trong chă rơ̆ih bơngai pơnă ba năm trŭh tơ̆ hơnĭh jang sa, pơtho tơbăt tơdrong jang găh ‘ngoăih hnam pơnă vă sơđơ̆ng ‘lơ̆ng hơ iă păng trŏ lăp hăm tơdrong đei ƀô̆h yan au kơ rim hnam pơnă. Tơ̆ kơsơ̆, rim kơdră tang măt pơma dơnŭh tơ̆ khŭl găh Tơdrong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Tần số vô tuyến điện păng tơdrong vă pơjing Khôi luơ̆t Đak dau yŭh sŏh (hơmet ming).

Tơblơ̆ nơ̆r: Amazưt