VOV4.Bahnar - Hơnơ̆ng pơgơ̆r hop akom mă 3, pơgê năr 30/5, pơma dơnŭh tơ̆ hnam hop akŏm găh tơdrong jang kiơ̆ trong bơ̆ jang, khôi luơ̆t găh bơ̆ jang, pơ prŏ ăn jô̆ đơ̆ng mă Khôi luơ̆t Pơ prŏ ăn đei tơlĕch jang kiơ̆, rim kơdră tang măt tơƀô̆h hơdăh dôm tơdrong tim mă lăp lơ̆m dăr lăng hơlen trong pơ prŏ ăn, pơm ăn trŭh oei 104 trong pơ prŏ ăn tim mă pơjing keh đang, tim mă kĭ tơchơ̆t, pơm kơnê̆ trŭh atŏk tơ iung mŭk drăm-tơpôl. Kiơ̆ đơ̆ng rim kơdră tang măt, Khôi luơ̆t tơ iung pơjing pơkăp tơdrong jang pơ prŏ ăn kăl đei tơbăt hơdăh lơ̆m trang kơtơ̆ng ang điện tư kơ dơnŏ anĭh bơ̆ jang pơ prŏ ăn. Mălei, yan au bơ̆ jang tơbăt hơdăh kơtơ̆ng ang pơ prŏ ăn oei lăp pơ gia, mă kăl pơ prŏ tơ iung pơjing, pơ prŏ ăn găh tĕh. Lơ nơ̆r tơgop kơdră tang măt athei Kuô̆k hô̆i pơjing Tơdrong tơchơ̆t dăr lăng tơdrong jang kiơ̆ trong bơ̆ jang, khôi luơ̆t găh bơ̆ jang pơ prŏ ăn păng mĭnh ƀar trong bơ̆ jang vă hơmet pơ ‘lơ̆ng tơnap tap, tơhlăk tơhlĭn, atŏk kơtang jang ‘lơ̆ng păng atŏk kơtang pơjing keh đang pơ prŏ ăn. Adoi athei, lơ̆m khei năr bơ̆ jang pơ jing trong pơ prŏ ăn kăl ‘moi kiơ̆ ƀlep yan au, hơlen hơdăh găh tơdrong đei, tơdrong rơvơn kơ hơnĭh bơ̆ jang tơm, hơnih bơ̆ jang tơring; tơmơ̆t dơ̆ng tơchơ̆t, pơkăp xek tơlang hơdăh hăm tơdrong pơm hiơ hiơ̆ dăh mă ư̆h kơ đei tơroi tơbăt hơdăh tơdrong pơ prŏ ăn.

Tơblơ̆ nơ̆r: Amazưt