Lơ̆m 2 năr 27, 28/10, tơ̆ 'Măng hop akŏm mă 4, Kuôk hô̆i akŏm tơblang dôm tơdrong đei jơnei, dôm tơdrong oei tơjruh duh nhen nơ̆r pơtruh vă pơm kiơ̆ pơkăp hơtŏk mŭk drăm – tơpôl, jên mong.

'Măng hop akŏm mă 4, Kuôk hô̆i jăl 15

'Măng pơma đam đei pơre nơ̆r, pơdăh um rŭp kơtă vă bơngai tăh hla păng kon pơlei jâ̆p teh đak hơlen lăng. Tơroi găh tơdrong đei jơnei mŭk drăm – tơpôl ăn ƀôh, kơchĕng lơ̆m xơnăm đei 14/15 pơkăp đei jơnei hloh kơ tơdrong pơkăp Kuôk hô̆i pơjao. 'Nâu jing tơdrong adrin kơ tôm anih jang chĭnh trĭ păng tơpôl, trong jang pran ăn pơkăp 5 xơnăm. Mă lei, adrô̆ pơkăp hơtŏk bơngai jang lơ̆m tơpôl ưh đei jơnei. Adrô̆ hơtŏk pơm jang lơ̆m tơpôl tŏk đơ̆ng 4,7 - 5,2%, noh kơđeh hloh kơ pơkăp tơlĕch đơ̆ng 0,3 truh 0,5%. 'Nâu jing tơchơ̆t kăp gĭt tơroi găh tơdrong tơgar jang mŭk drăm. Lơ̆m kơplăh hơtŏk mŭk drăm yak hloh pơhlom 2% pơtêng hăm pơkăp păng GDP hăm rim kơ̆l bơngai duh nhen hloh tơdrong pơjao jang. Tơ̆ 'măng pơma đam găh mŭk drăm – tơpôl păng jên mong, rim bơngai tang măt păng kon pơlei hơpơi 'moih, Kuôk hô̆i gô tơlĕch lơ trong jang tơnăp, “pơm trong hơtŏk” hơ 'nhăk teh đak hơmet pơ 'lơ̆ng đơ̆ng rŏng kơ pơrang jĭ Covid-19.