VOV4.Bahnar - Năr ‘nâu (6/6), Hop akŏm mă 3, Kuô̆k hô̆i jăl 15 mât lơ̆m giĕng bơ̆ jang mă 3. 1 lơ̆m dôm tơ drong gĭt kăl đei dôm bơ ngai tang măt pơ ma nuh tơ̆ grŭp pơ gê hei ‘nŏh jĭ Trong tơ mât jên jang pơm trong ver 3 plt Hồ Chí Minh păng trong ver 4 anih tơm Hà Nội. 

Lơ bơ ngai juăt jang pơ ma hơ dăh, Hà Nội păng plt Hồ Chí Minh ‘nŏh jĭ “‘măng mât lĕch” anih truh đơ̆ng dôm bơ ngai tơ mât jên jang păng tơ moi chă tơ mang lăng lơ̆m apŭng plenh tĕh. Tơ drong tơ mât jên ăn tơ drong jang pơm trong ver 3 păng 4, pơm ‘lơ̆ng ăn trong yak vih vât hiôk hian vang tơ gop gĭt kăl vă tưk tơ iung, roi tơ băt, sơng iŏk jên tơ mât jang păng chă tơ mang lăng đơ̆ng tơ moi tĕh đak đe truh tơ̆ Việt Nam.

Kiơ̆ tơ drong hop akŏm, lơ̆m giĕng ‘nâu, Kuô̆k hô̆i oei vă pơ ma găh tơ drong tơ chơ̆t jang pơ long năng 1,2 trong jang, tơ drong tơ gŭm hơ drô̆ vă atŏk tơ iung dêh char Khánh Hòa; pơ ma nuh găh tơ drong pơ truh jên asong tŏk iŏk hơ lơ̆k dơ̆ng, tơ drong dơ̆ng tang đơ̆ng Khul kơ dră tĕh đak mưh tơ lĕch jên tĕh đak. Mă loi, Kuô̆k hô̆i ‘măn 2 năr 1 puăt vă mơ̆ng tơ drong apinh păng tơl nơ̆r apinh jet găh 1,2 tơ drong ƀơm truh tơ drong choh jang xa păng atŏk tơ iung tơ ring tơ rang, jên hu păng trong nơ năm, gre chơ chuĕn.

Dơ̆ng: Tơ blơ̆