VOV4.Bahnar - Pơ gê ‘năr 6/6, ‘măng hop akŏm mă 3, Kuôk hô̆i jăl 15 pơ ma dơ nuh tơ̆ grŭp găh trong jang tơ mơ̆t jên jang 3 tơ drong jang pơm trong gre kơ dâu hrĕnh Châu Đốc - Cần Thơ - Sóc Trăng (jăl jang 1); Khánh Hòa - Buôn Ma Thuột (jăl jang 1); Biên Hòa -Vũng Tàu (jăl jang 1) păng trong jang tơ mơ̆t jên jang pơm trong ver 4 tơ ring Anih tơm Hà Nội păng tơ drong jang pơm trong ver 3 pơ lei tơm Hồ Chí Minh. Lơ bơ ngai tang măt tơ ƀôh đon lăp hăm trong jang tơ mơ̆t jên jang 5 tơ drong jang pơm trong nơ năm vă hơ tŏk tơ iung mŭk drăm - tơ pôl, hơ tŏk tơ iung trong nơ năm, hơ met pơ ‘lơ̆ng hrăt hrot lơ̆m chơ chuĕn tơ mam, tơ jur gre tơ̆m preh băl tơ̆ trong nơ năm. Mă lei dôm bơ ngai tang măt kŭm tơ gop nơ̆r hơ dăh, athei Khŭl kơ dră teh đak pơm rơ đăh 1,2 tơ drong lơ̆m trong jang tơ mơ̆t jên jang kŭm nhen dôm trong jang bơ̆ jang kiơ̆ tơ drong jang. Hăm 3 tơ drong jang pơm trong gre Châu Đốc - Cần Thơ - Sóc Trăng; Khánh Hòa - Buôn Ma Thuột; Biên Hòa -Vũng Tàu 1,2 ‘nu bơ ngai tang măt tơ ƀôh đon bơ ngơ̆t yua kơ ƀơm truh lơ teh bri, lơ̆m noh hơ drô̆ tơ drong jang Khánh Hòa - Buôn Ma Thuột kăl kơ tơ plih teh bri tŏk truh hloh 219 rơ bâu hek tar.

Thuem: Tơ blơ̆