VOV4.Bahnar - Năr ‘nâu, năr 5 (10/6) Kuô̆k hô̆i pơ ma nuh găh Trong tơ mât jên ăn 5 Tơ drong jang pơm trong gre đei: Trong ver 4 tơ̆ Anih tơm Hà Nội; trong ver 3 plt Hồ Chí Minh; tơ drong jang pơm trong gre kơ dâu hrĕnh Châu Đốc – Cần Thơ - Sóc Trăng; Khánh Hòa – Buôn Ma Thuột; Biên Hòa – Vũng Tàu. ‘Nâu jĭ dôm tơ drong jang đei tơ lĕch kiơ̆ tơ drong Tơ chơ̆t đơ̆ng hop akŏm mă 13 kơ Đảng păng tơ drong tơ chơ̆t 31 đơ̆ng Kuô̆k hô̆i găh hơ met ming trong jang mŭk drăm lơ̆m 20 sơ năm, man trong gre păng hơ tŏk trong tơ ƀưh tơ ring. 

Kơ sơ̆ brei, ‘măng hop akŏm mă 3, Kuô̆k hô̆i jăl 15 hlôi pơ gơ̆r đang tơ drong apinh jet păng tơl nơ̆r apinh jet lơ̆m 2 năr 1 puăt. Phó Thủ tướng Phạm Bình Minh iung tơ blang hơ dăh dơ̆ng lơ tơ drong ƀơm truh păng tơl nơ̆r apinh đơ̆ng dôm bơ ngai tang măt Kuô̆k hô̆i. Dôm bơ ngai tang măt akhan, tơ drong apinh jet păng tơl nơ̆r apinh jet hlôi tơ ƀôh hơ dăh tơ drong tơ plih ‘nao, ‘măng mă âu ưh đei ƀok kơ dră yơ roi tơ ƀôh tơ drong jang đei ‘lơ̆ng đơ̆ng anih sư vei lăng, yoa thoi nŏh đei lơ jơ ăn bơ ngai tang măt tơ lĕch nơ̆r apinh. Dôm tơ drong Kuô̆k hô̆i rơih vă apinh jet ‘măng mă âu đei đơ̆ng yăn âu ngăl, tơ ƀôh hơ dăh đon hơ pơi ‘mĕh, nơ̆r tơ gop đơ̆ng bơ ngai tăh hla păng kon pơ lei. Nơ̆r tơl đơ̆ng dôm kơ dră năng atŭm kŭm tôch tơ păt, trŏ tơ drong, pơm lăp đon hăm dôm nơ̆r apinh đơ̆ng bơ ngai tang măt Kuô̆k hô̆i tơ lĕch.

Dơ̆ng: Tơ blơ̆