Hơ nơ̆ng bơ̆ jang lơ̆m hop akŏm mă 4, pơ gê 2/11, Kuô̆k hô̆i pơ ma nuh tơ̆ grŭp găh Luơ̆t vei lăng tơ drong đei yoa ăn bơ ngai răt tơ mam (oei chih hơ met). Tơ drong đei lơ bơ ngai tang măt tơ rĕk, pơ ma nuh, ‘nŏh jĭ vei lăng bơ ngai răt tơ mam kăl, mă loi jĭ răt đơ̆ng mang. 

Kơ dră tơm vei lăng jang kơ măy, tĕch mơ dro Nguyễn Hồng Diên

Dôm bơ ngai tang măt lăp đon hăm tơ drong kăl tơ lĕch luơ̆t hăm dôm tơ drong đei chih lơ̆m Hla ar tơ roi đơ̆ng Khul kơ dră tĕh đak, mă lei athei tơ rĕk truh tơ drong jang tŏk đơ̆ng rim trong tĕch mơ dro, răt yoa tơ mam ‘nao; athei pơm ‘lơ̆ng tơ drong pơm tơm kơ kon bơ ngai, tơ drong đei yoa đơ̆ng bơ ngai răt; kăl tơ rĕk ‘nŏh jĭ kơ sô̆ tơ drong pơm glăi tơ drong đei yoa kơ bơ ngai răt tŏk hrĕnh, mă lei trong sek tơ lang tam mă đei yoa ‘lơ̆ng.

Tơ̆ grŭp pơ ma nuh, Kơ dră tơm vei lăng jang kơ măy, tĕch mơ dro Nguyễn Hồng Diên- bơ ngai tang măt Khul plt Hải Phòng pơ ma hơ dăh: găh tơ drong vei lăng tơ drong đei yoa đơ̆ng bơ ngai răt tơ mam kăl, mă loi răt tơ mam kiơ̆ đơ̆ng mang, ‘nâu jĭ tơ drong gĭt kăl đei Anih tơm păng dôm anih jang hơ met pơ ‘lơ̆ng khei ‘năr âu ki. Mă hơ dăh nhen chih hơ dăh hla ar pơ kăp kiơ̆ trong tĕch mơ dro dăm điên tư, vei lăng ‘lơ̆ng tơ mam mưh tĕch mơ dro.