Pơtoi tơdrong Hop akŏm mă 4, Kuôk hô̆i jăl 15, pơgê năr 24/10, tơ̆ Hà Nội, Kuôk hô̆i pơma đam tơ̆ hnam akŏm găh minh ƀar tơdrong oei đei nơ̆r pơma phara băl găh chiha kŏm Luơ̆t Khăm hơmet jĭ  (hơmet ming).

Tơdrong hop akŏm 'măng mă 4 Kuôk hô̆i jăl 15

Chih akŏm Luơ̆t khăm hơmet jĭ ming hơmet đei 12 apăng păng 121 tơdrong, lơ hloh 15 tơdrong pơtêng hăm chih akŏm pơtruh ăn Kuôk hô̆i tơ̆ hop akŏm mă 3, lơ tơdrong hlôi keh đang, mă lei, oei đei minh ƀar tơdrong kăl hơmet ming dơ̆ng. Luơ̆ưt khăm hơmet jĭ jing lươ̆t kăp gĭt kơ anih jang y tê̆, xơkơ̆t tơdrong vei lăng păng hơtŏk tơ iung kơjăp kơ tơdrong jang vei lăng jơhngơ̆m jăn kon pơlei, đei tơrĕk tih tên truh kon pơlei duh nhen anih jang y tê̆; đei kon pơlei, anih jang y tê̆ gô chang, lơ tơdrong hơpơi vă hơmet pơ 'lơ̆ng tơdrong vei lăng jơhngơ̆m jăn kon pơlei păng chih akŏm pơkăp khôi luơ̆t kơjăp ăn tơdrong jang khăm hơmet jĭ vă chih akŏm Luơ̆t vei xơđơ̆ng đunh đai.