Hơnơ̆ng pơgơ̆r hop akŏm mă 9, Kuô̆k hô̆i jăl 15, pơgê brei (17/06), Kuô̆k hô̆i pơma dơnuh tơ̆ hnam hop akŏm găh lăng hơlen tơmơ̆t dơ̆ng tơdrong hơlen jang kiơ̆ trong pơprŏ atŏk tơ iung mŭk drăm-tơpôl păng kon jên jang teh đak sơnăm 2024, tơdrong jang kiơ̆ trong pơprŏ atŏk tơ iung mŭk drăm-tơpôl păng kon jên jang teh đak dôm khei blŭng sơnăm 2025. Hôn bơnê kơtang dôm tơdrong hlôi iŏk đei nhen, tơdrong tŏk GDP iŏk đei 7,09%; mŭk drăm-tơpôl hơmet pơ ‘lơ̆ng hơ iă; tơdrong jang kmăi kmŏk pơm tơlĕch tơmam drăm, mơdro sa, tĕch mơdro, tơmang pơhiơ̆ tŏk ‘lơ̆ng hơ iă; Tơdrong hơrih sa tơpôl, sơđơ̆ng tơpôl đei vei lăng kơjăp ... Mă lei, rim kơdră tang măt jei tơƀôh hăm dôm tơdrong long, tơdrong tơnap tap vă jang keh đang trong tơlĕch ăn tŏk GDP sơnăm 2025 iŏk đei đơ̆ng 8% năm tơ̆ lơ păng tŏk ƀar kơsô̆ lơ̆m dôm sơnăm đơ̆ng rŏng. Jei lơ̆m pơgê năr 17/6, hăm lơ kơdră tang măt vang pơdrơ̆ng đei drơ̆ng nơ̆r, Kuô̆k hô̆i hlôi pơdrơ̆ng kiơ̆ Tơdrong tơchơ̆t găh tơjur thuê̆ VAT pơlăp hăm rim tơmam drăm, tĕch mơdro tŏk bŏk đei iŏk thuê̆ 10% đơ̆ng năr 1/7/2025 truh đĭ năr 31/12/2026. Hăm tơdrong tơchơ̆t ‘nao Kuô̆k hô̆i pơdrơ̆ng kiơ̆, lơ tơmam drăm gô đei tơjur 2% thuê̆ kơjă tĕch răt (VAT) truh đĭ sơnăm 2026.