VOV4.Bahnar - Kơ sơ̆ ‘năr 7/6, Kuôk hô̆i pơ tơm ‘măng hop akŏm apĭnh jet blŭng a lơ̆m 2 năr 1 puăt pơ gơ̆r apĭnh jet păng tơl nơ̆r apĭnh jet. Kơ dră Anih tơm vei lăng găh Choh jang sa păng hơ tŏk tơ iung tơ ring tơ rang Lê Minh Hoan jĭ bơ ngai mă blŭng tơ̆l nơ̆r apĭnh tơ̆ hơ năp Kuôk hô̆i. Pơ ma pơ gơ̆r ‘Măng apĭnh jet păng tơ̆l nơ̆r apĭnh jet, Kơ dră kuôk hô̆i Vương Đình Huệ tơ băt, tơ drong apĭnh jet tơ̆ ‘Măng hop akŏm âu đei pơ gơ̆r kiơ̆ trong iŏk grŭp tơ drong pơm tơm, tơ drong găh hơ năp jang đơ̆ng kơ dih bơ ngai hơ yơ, bơ ngai ‘noh đei hơ năp jang tơl nơ̆r. 4 grŭp tơ drong apĭnh jet găh tơ drong jang vei lăng teh đak đơ̆ng dôm Anih tơm: vei lăng Jên hu, Choh jang sa păng Hơ tŏk tơ iung tơ ring tơ rang, Trong nơ năm gre kơ dâu, Anih mong jên teh đak Việt Nam tơ̆ ‘măng hop akŏm âu.

Găh tơ drong choh jang sa, hop akŏm Kuôk hô̆i tơ tŏ hăm dôm nơ̆r apĭnh găh “ tơ drong jang đei plei lơ, kơ jă reh” păng dôm tơ drong dŏng iŏk tơ mam đơ̆ng choh jang sa tam mă đei tôch; tơ drong kơ jă phŏng, pơ gang hơ drông, tơ mam hiĕm kon tơ rong, dôm kơ loăi tơ mam choh jang sa blŭng a tŏk. Tơl nơ̆r dôm bơ ngai tang măt Kuôk hô̆i, dôm trong jang Kơ dră tơm Lê Minh Hoan pơ ma hơ dăh ‘noh jĭ tơ drong pơ gơ̆r dơ̆ng pơm tơ lĕch, krao hơ vơn kon pơ lei mơ̆t lơ̆m Hơp tak xăh. Hơ dai hăm pơ ma hơ dăh truh đon tơ chĕng tơ plih đơ̆ng pơm tơ lĕch choh jang sa jing đon tơ chĕng jang mŭk drăm choh jang sa.

Kiơ̆ đơ̆ng mơ̆ng, lăng nơ̆r tơ roi đơ̆ng Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan, ƀok Nay Hứ (66 sơ năm, bơ ngai tăh hla tơ̆ phường Tây Sơn, plt Pleiku, dêh char Gia Lai) tôch tơ rĕk truh dôm trong jang mă Kơ dră tơm tơ lĕch hăm kơ jă tơ mam pơ yoa ăn choh jang xa oei tŏk lơ hrei ‘nâu. Ƀok Nay Hứ hơ pơi ‘mĕh, đơ̆ng rŏng hop akŏm, Anih tơm vei lăng choh jang xa păng atŏk tơ iung tơ ring tơ rang đei trong jang mă hơ dăh, lăp hăm rim tơ ring vă sek tơ lang ‘lơ̆ng dôm tơ drong tơ hlăk lơ̆m tơ drong atŏk tơ iung choh jang xa:

“Hơ pơi ‘mĕh đơ̆ng rŏng kơ hop akŏm, Kơ dră tơm đei trong jang mă rơ đăh, chĕp kơ̆l pơ gơ̆r, pơ tho tơ ƀôh mă ‘lơ̆ng ăn rim tơ ring bơ̆ jang mă lăp. Pơ tih gia nhen Tây Nguyên âu, mă lơ ‘nŏh đe choh jang xa ngăl kơ na pơm thoi yơ vă tơ lĕch đei trong choh jang xa ăn Tây Nguyên trŏ trong, đei yoa hlŏh dơ̆ng"

Năr ‘nâu, Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan vă iung tơl tơ blang dơ̆ng nơ̆r apinh tơ̆ hơ năp Kuô̆k hô̆i. Đơ̆ng rŏng kơ ‘nŏh jĭ tơ drong apinh păng tơl nơ̆r apinh đơ̆ng Kơ dră tơm vei lăng jên hu Hồ Đức Phớc păng kơ dră chĕp kơ̆l Anih mong jên tĕh đak Việt Nam Nguyễn Thị Hồng.

Thuem hăm Dơ̆ng: Tơ blơ̆