VOV4.Bahnar - Pơgê năr 23/5, tơ̆ Hnam Kuô̆k hô̆i, kơ yuơ Kơdră chĕp pơgơ̆r Vương Đình Huệ pơm tơm, Kuô̆k hô̆i hlôi pơgơ̆r blŭng ‘Măng hop akŏm mă 3, Kuô̆k hô̆i jăl XV. Hơdrol pơgơ̆r blŭng a hop akŏm, Kơdră chĕp pơgơ̆r Tĕh đak Nguyễn Xuân Phúc, Thủ tướng Tĕh đak Phạm Minh Chính, Kơdră chĕp pơgơ̆r Kuô̆k hô̆i Vương Đình Huệ atŭm hăm rim Kơdră tang măt Kuô̆k hô̆i hlôi năm ming gơvang pơkao, mơt hơpong pơsat Kơdră chĕp pơgơ̆r Tĕh đak Hồ Chí Minh.

Rup Hop akŏm mă 3, Kuôk hô̆i jăl XV

Tơ̆ Hop akŏm, Kuôk hô̆i gô lăng hơlen, tơchơ̆t Trong jang tơmơ̆t jên jang 5 tơdrong vă jang pơm trong nơnăm tơm ‘nŏh Trong ver 4 tơring Hơnĭh tơm Hà Nội; Trong ver 3 pơlei tơm Hồ Chí Minh; Trong gre rĕnh Biên Hòa -Vũng Tàu; Trong gre rĕnh Khánh Hòa - Buôn Ma Thuột; Trong gre rĕnh Châu Đốc - Cần Thơ - Sóc Trăng. Kơdră chĕp pơgơ̆r Kuô̆k hôi Vương Đình Huệ pơma hơdăh, rim Kơdră tang măt Kuô̆k hôi akŏm ăn tơgop nơ̆r găh tơdrong kăl hlŏh kơ tơdrong vă jang; klăh asong kon jên tơmơt jang, trong iung jang hrơ̆p mĭnh ‘măng kơ trong pơ prŏ jang tĕh đak, tơring đei tơlĕch jang vă sơđơ̆ng ăn iung jang ming man, klăh asong kon jên tơmơ̆t jang păng tơlĕch jang kiơ̆, hơmet pơ ‘lơ̆ng tơnap tap tơchơ̆t tơmơt jên jang koăng mă lei tơlĕch jang kiơ̆ hiơ hiơ̆, pơđunh khei ‘năr, pơm hiong răm kon jên tơmơ̆t jang.

Tơblơ̆ nơ̆r: Amazưt