Hơnơ̆ng pơgơ̆r ‘măng Hop akŏm mă 4, năr 31/10, Kuô̆k hô̆i ‘măn prăt năr pơma dơnŭh găh Hla bơar tơbăt pơtôch bơ̆ jang dăr lăng “Tơdrong jang kiơ̆ trong bơ̆ jang, khôi luơ̆t găh jang kiơ̆ pơkom, tang găn brăh brư jăl sơnăm 2016-2021” lơ̆m tơdrong jang tĕh đak.

Kuô̆k hô̆i ‘măn kơtĕch năr 31/10 vă lăng hơlen jang kiơ̆ trong bơ̆ jang, khôi luơ̆t găh jang kiơ̆ pơkom, tang găn brăh brư jăl jang 2016-2021

Rim Kơdră tang măt Kuô̆k hô̆i iung pơma athei hơmet pơ ‘lơ̆ng dôm tơdrong tơhlăk tơhlĭn, tơnap tap lơ̆m vei lăng hơnĭh bơ̆ jang, vă rim tơdrong tơchơ̆t đei jang kiơ̆ kơ jăp, pơkom păng jơnei. Hlŏh đơ̆ng dăr lăng đei ƀô̆h, tơdrong vei lăng, iŏk yua kon jên jang tĕh đak, rim kon jên jang kơ tĕh đak anai đei tơlĕch ‘lơ̆ng hơ iă, sơđơ̆ng kơ jăp, pơkom păng đei jơnei hlŏh. Mălei, hla bơar tơbăt jei tơƀô̆h hơdăh: Tơdrong pơjing, hơlen hơdăh trong pơprŏ kon jên jang tĕh đak tim mă trŏ ƀlep hăm yan au. Rơbau tơdrong vă jang tơlĕch jang hiơ hiơ̆, rơbau tơdrong vă jang hiong răm, brăh brư pơm ư̆h rơvơn ăn atŏk tơ iung kơ tĕh đak. Rim kơdră tang măt athei, ‘nĕ pă drơ̆ng drơ̆t hăm rim tơdrong vă jang kăl Tĕh đak tơgŭm ăn mŭk drăm tơpôl, mă kăl rim tơdrong jang tơring groi kông, tơring kon kông. Lơ̆m rim trong tơlĕch jang đei pơma hơdăh, rim kơdră tang măt pơma hơdăh, tơdrong tơmơ̆t jên jang keh đang hloi gô pơm dă ƀiơ̆ đei jơhngơ̆m đon ‘nhoi dĭh băl lơ̆m klăh asong kon jên tơmơ̆t jang. Mă kăl, tơchơ̆t pơkom, tang găn brăh brư kăl pơm kiơ̆ mă kơ jăp hloi, mă kăl hăm bơngai chĕp kơ̆l dơnŏh anĭh bơ̆ jang, tơring tơrang.