Tơ̆ ‘măng pơma dơnuh, ƀar ‘nu kơdră pơma tơbăt jơhngơm đon chơt hơ iă tơ̆ hơnăp tơdrong atŏk tơ iung ‘lơ̆ng hơ iă kơ tơgoăt tơgoăl jang hơdoi Việt Nam - Lào khei năr ou ki lơ̆m rim tơdrong jang, đơ̆ng tơdrong jang chinh trĭ, tơbôl, sơđơ̆ng teh đak truh tơdrong jang mŭk drăm, oei sa joh ayŏ, pơtho pơhrăm păng jang hơdoi tơring. Lơ̆m khei năr kơnh, ƀar păh drơ̆ng mĭnh nơ̆r hơnơ̆ng atŏk kơtang lui yom dih băl chinh trĭ; vei kơjăp rim ‘măng năm ngôi, tơƀơ̆p dih băl khul kơdră kơpal păng rim kâp lơ̆m rim khul jang Đảng, teh đak, Kuô̆k hô̆i, Jơnŭm vei lăng kon pơlei păng kon pơlei năm ngôi dih băl; atŏk kơtang jang hơdoi rim tơdrong bơ̆ jang, tơbăt dih băl trong jang hơ iă ƀar păh Jơnŭm vei lăng Kon kông, rim Hơnih bơ̆ jang păng Khul nghĭsi tơgoăt tơgoăl ƀar teh đak lơ̆m bơ̆ jang tơ iung pơjing Khôi luơ̆t, dăr lăng păng xek tơlang rim tơdrong kăl, hơnơ̆ng tơgum djru dih băl tơ̆ rim ‘măng hop akŏm lơ̆m tơring păng apŭng plĕnh teh nhen AIPA, IPU, APF vă vei lăng năng tông tơdrong đei iŏk yoa kơ ƀar teh đak păng tơring. Ƀar păh drơ̆ng mĭnh nơ̆r iung jang hơdoi pơgơ̆r rim tơdrong pơgơ̆r tơbăt 65 sơnăm pơjing tơgoăt tơgoăl tơbôl păng 50 sơnăm kĭ Pơkăp Tơgoăt tơgoăl păng Jang hơdoi Việt Nam - Lào lơ̆m sơnăm 2027, lang să joăt joe tơgoăt tơgoăl, pôm nơ̆r ƀơ̆r đon kơjăp Việt Nam-Lào truh rim răih kon pơlei ƀar teh đak, mă kăl jơhnơr mơlôh. Ƀar teh đak hơnơ̆ng tơlĕch jang kiơ̆ jơnei rim tơdrong drơ̆ng mĭnh nơ̆r kơdră kơpal păng pơtôch ‘măng hop akŏm ‘măng mă 48 kơ Hơnih bơ̆ jang Hơdoi Khul kơdră chĕp pơgơ̆r Việt Nam - Lào, hơnhăk đei jơnei hơ iă ăn kon pơlei ƀar teh đak, tơgop pơm hơtok ‘lơ̆ng tơgoăt tơgoăl Lào - Việt Nam ling lang ‘lơ̆ng hơ iă, kơjăp iăp kơtang.