VOV4.Bahnar - Lơ̆m 4 năr pơ dơh lêh Quốc khánh 2/9, Đà Lạt – Lâm Đồng lăp sơng đei 85.000 ‘nu tơ moi. Rim tơ drong jang pơ vih pơ văn tơ mang lăng tă kơ vei sơ đơ̆ng ‘lơ̆ng ngăl. Lơ̆m kơ sô̆ 85.000 ‘nu tơ moi truh tơ̆ Đà Lạt – Lâm Đồng tơ mang lăng, pơ dơh ngôi lêh âu đei 1.500 ‘nu tơ moi apŭng plĕnh teh, 13.500 tơ moi lơ̆m teh đak, lơ̆m noh đei 60.000 ‘nu tơ moi ƀĭch pơ dơh. Yua đơ̆ng tơ moi ƀĭch pơ dơ̆h tŏ sĕt kơ na hơ nih ăn đe thuê ƀĭch pơ dơh lăp ‘nao iŏk đei jô̆ păh lăp 65% hơ nih lăm pơ dơh. Lơ̆m năr pơ dơh lêh, Đà Lạt – Lâm Đồng ưh kơ đei ƀôh trong nơ năm hrăt hrot đunh tơ̆ hơ nih kơ drơ̆m.

Tơ moi ưh kơ tŏk lơ kơ na hơ nih kơ drơ̆m Đà Lạt rơ hơi hiôk, ưh kơ hrăt hrot tơ̆ gơ măng nhen dôm khei năr hơ drol

Rim tơ drong jang tơ mang lăng nhen tĕch mơ dro tơ mam sŏng sa, ngôi pơ chơt, hơ nih tơ mang lăng kŭm tă kơ đei ƀôh hmă, ưh kơ hrăt hrot nhen dôm năr hơ drol. Kiơ̆ kơ Anih vei lăng găh joh ayŏ, tơ plŏng kơ dâu păng tơ mang lăng Lâm Đồng, tơ drong tơ moi truh tơ̆ Đà Lạt – Lâm Đồng ưh kơ tŏk lơ lơ̆m năr pơ dơh lêh yua đơ̆ng tơ moi năm răh rai hơ nơ̆ng lơ̆m năr hơ tuch giĕng. Mă hơ dăh, 8 khei blŭng sơ năm ‘nâu, akŏp tơ moi truh tơ̆ Đà Lạt – Lâm Đồng hlôi iŏk đei hloh 5 triệu ‘nu, tŏk 153% pơ têng hăm khei ‘nâu sơ năm sơ̆.

Thuem: Tơ blơ̆