Lơ̆m tơdrong lêh, lơ tơdrong jang đơ̆ng apŭng plenh teh đei pơgơ̆r nhen: Ming pơdă, roi tơƀôh tơmam hla che păng kơmăy kơmŏk pơm hla che ‘nao; Hop akŏm găh trong jang pơm hơtŏk hơnăn hla che Việt; pơgơ̆r nhă ngôi đak hla che hăm bơngai tang măt păng tơmoi lơ̆m apŭng plenh teh; Năr jŏh ayŏ tơ̆ trong glung păng tơdrong juăt nhă đak hla che; Trong chă tơmang lăng tơ̆ tơring juăt pơtăm hla che; kŭm hăm dôm tơdrong joh hơri hơxoang, et ngôi đak tra nai.

‘Ngoăih kơ ‘nŏh, oei pơgơ̆r lơ tơdrong jang tơ̆ ‘ngoăih kơ năr lêh nhen: Anih hơri hơxoang, nhă đak tra Việt, ming pơdă rim tơmam pơm đơ̆ng hla che; Tơdrong thi “Gen Tra” ‘măn ăn sinh viên dôm hnam trưng đăi hŏk, pơlung pơcheh rơgei păng iung jang xa đơ̆ng hla che… Lêh Hla che apŭng plenh teh 2025 đei hơmĕng jing anih truh jŏh ayŏ kơ dŏ xoang – chă tơmang lăng – jang mŭk drăm tih kơ apŭng plenh teh tơ̆ Lâm Đồng păng Việt Nam, pơih đei trong yak ‘nao ăn tơdrong juăt pơtăm, nhă đak hla che Việt păr jơ̆p plei teh./.