Đơ̆ng rŏng 1 sơnăm tơlĕch jang, dêh char Lâm Đồng hlôi hơmet pơ ‘lơ̆ng khul kơdră pơgơ̆r đơ̆ng dêh char truh tơ̆ tơring. Đơ̆ng rŏng klơ hơmet ming, anih jang đei tơjur lơ, lơ̆m noh Grŭp Đảng jur 66,6%, grŭp Khul kơdră pơgơ̆r jur 61,9%; lơ̆m dêh char hlôi pôk rơih đang Khul chĕp kơ̆l đảng, Kơdră Jơnŭm pơgơ̆r kon pơlei, Anih vei lăng kon pơlei tơ̆ 124 xăh, phường, tơring gĭt kăl păng krao akŏm hlŏh 730 ‘nu kăn ƀô̆, bơngai jang ăn teh đak jur bơ̆ jang tơ̆ tơring.

Kŭm hăm hơmet ming khul kơdră pơgơ̆r, dêh char oei hơtŏk tơdrong hơmet ming trong pơm hla ar, tơplih hăm kơmăy sô̆, kăt tơjur dang 30% hla ar; 100% tơdrong pơvih trư̆k tuyê̆n đei chih akŏm lơ̆m kơmăy. Tơdrong sơng kon pơlei, sek tơlang tơdrong tơkêng đei jang hơnơ̆ng; tơdrong chinh trĭ, tơpôl, vei sơđơ̆ng teh đak đei vei lăng kơjăp.

Pơma găh tơdrong bơ̆ jang, ƀok Y Thanh Hà Niê Kđăm, Kơdră jang lơ̆m Trung ương Đảng, Bí thư Đảng dêh char Lâm Đồng pơma hơdăh, tơdrong hơmet pơ ‘lơ̆ng Khul kơdră pơgơ̆r tơring 2 tăl ‘nŏh jĭ tơdrong gĭt kăl dang ei, vă pơyoa truh ning mônh hai; ưh lăp vă tơiung jơhngâm pran ăn tơdrong jang tŏk đĕch mă oei vă hơtŏk ki luơ̆t, đon jang tơnăp đơ̆ng bơngai chĕp kơ̆l dơ̆ng. Mă lei, hơdai hăm dôm tơdrong jang đei athei lăng tơpăt truh dôm tơdrong oei pơmat tat, pơlong nol, dôm tơdrong tam mă pran ‘lơ̆ng athei hơmet ming dơ̆ng.

“Hơdai hăm dôm tơdrong jang đei, khul kơdră pơgơ̆r mă đơ̆ng hlôi bơ̆ jang sơđơ̆ng bơih ră mă lei tam mă klĕp ‘lơ̆ng đơ̆ng dêh char truh tơ̆ tơring. Tơdrong hơmet ming kăn ƀô̆ tơ̆ 1,2 tơring oei tơhlăk, mĭnh ƀar anih tam mă tôm bơngai jang. Tơdrong ‘lơ̆ng, rơgei đơ̆ng khul kăn ƀô̆, bơngai jang ăn teh đak tam mă hơnơ̆ng, mă loi ‘nŏh tơ̆ xăh. Oei đei bơngai jang tam gan gơ̆h. Tơdrong tơguăt hơdai, pơtruh păng iŏk yoa kơsô̆ đei chih răk lơ̆m kơmăy tam mă gan ‘lơ̆ng, hiôk hian. Tơdrong chih pơjing kơsô̆ atŭm pơyoa ăn tơdrong chĕp kơ̆l pơgơ̆r oei hiơ̆ hyĭn. Anih jang păng tơdrong iŏk yoa tơmam, kơmăy kơmŏk tam mă pơm lăp hăm tơdrong ‘mĕh vă”.

Pơma nơ̆r pơtho tơ̆ hop akŏm, Kơdră jang lơ̆m Trung ương Đảng, Kơdră chĕp kơ̆l Anih tơm jang Nội vụ Đỗ Thanh Bình tơchĕng ‘lơ̆ng đon kơchăng, bơ̆ jang tôch pơneh đơ̆ng Lâm Đồng mưh bơ̆ jang kiơ̆ trong jang ‘nao, mă loi ‘nŏh tơdrong ăn kăn ƀô̆ jur jang tơ̆ tơring păng hơtŏk tơdrong klăih song hơnăp jang. Mă lei, tơring oei hơnơ̆ng tơjră hăm tơdrong kơhret yoa tơring xă hlŏh lơ̆m teh đak, kon pơlei lơ, lơ kăn ƀô̆ athei năm bơ̆ jang hơtăih kơ unh hnam, oei ƀiên chê̆, anih jang kơmăy kơmŏk păng tơdrong tơgŭm ‘nŏh tam mă druh kiơ̆ lăp hăm tơdrong ‘mĕh vă tơ̆ yăn âu.

Ƀok Kơdră chĕp kơ̆l Anih tơm jang Nội vụ Đỗ Thanh Bình akhan, tơ̆ hơnăp kơnh, kơdră chĕp kơ̆l dêh char Lâm Đồng athei hơnơ̆ng hơlen năng, hơmet pơ ‘lơ̆ng khul kơdră pơgơ̆r; hơtŏk đon rơgei ăn khul kăn ƀô̆ jang tơ̆ tơring; hơtŏk tơdrong hơmet ming trong pơm hla ar, tơplih hăm kơmăy sô̆; hơtŏk tơdrong klăih song hơnăp jang păng dăr lăng păng iŏk tơdrong lăp đon đơ̆ng kon pơlei, anih tĕch mơdro pơm ‘long pơtŏ găh tơdrong bơ̆ jang rơgei, đei yoa đơ̆ng khul kơdră pơgơ̆r tơring 2 tăl.

Ƀok Kơdră Đỗ Thanh Bình pơma: “Tơ̆ hơnăp kơnh oei đei lơ tơdrong jang trăp trĭn athei Lâm Đồng hơnơ̆ng tơplih ‘nao mă pran, bơ̆jang đei yoa hlŏh dơ̆ng; hơtŏk tơdrong mât 1 ƀơ̆r đon, kơchăng, tơiung jơhngâm mưh bơ̆ jang. Adrin hơmet pơ ‘lơ̆ng mă tơtom dôm tơdrong pơmat tat, tơhlăk tăk, dôm anih oei tơhlăk vă Khul kơdră pơgơ̆r tơring 2 tăl bơ̆ jang roi đunh roi đei yoa, pơm lăp hăm tơdrong ‘mĕh vă jang tŏk hrĕnh păng pran kơjăp lơ̆m chăl ‘nao. Anih tơm jang Nội vụ vă jang hơdoi kơjăp, tơtom, kŭm hăm dêh char hơmet pơ ‘lơ̆ng dôm tơdrong oei pơmat tat, tơhlăk tăk vă khul kơdră pơgơ̆r tơring 2 tăl gơ̆h bơ̆ jang roi đei yoa ‘lơ̆ng tơ̆ yăn âu”.