VOV4.Bahnar - Đei ƀơm trŭh tơdrong pơrơ̆ng kŏh pơrăm ‘long bri git kăl vă pơm trong glung Trường Sơn Đông, năr 14/2 Dơnŏ anĭh vei lăng Chŏh jang sa păng Atŏk tơ iung Tơring tơrang dêh char Lâm Đồng hlôi pơm hla bơar pơtrŭh hăt hot ăn Dơnŏ anĭh vei lăng kon pơlei dêh char athei Hơnĭh tơm Jang tơgŭm ăn, Dơnŏ anĭh tơm Ƀô̆ đô̆i vei lăng sơlam tĕh đak pơrô̆ athei pơdơ̆h hloi tơdrong tơ iung pơjing ming an.

Hơnĭh ming man trong glung Trường Sơn Đông pơm kơnê̆ trŭh bri ‘long gĭt kăl

Kiơ̆ đơ̆ng, Dơnŏ anĭh vei lăng Chŏh jang sa păng Atŏk tơ iung Tơring tơrang dêh char Lâm Đồng, Dơnŏ anĭh vei lăng Bri ‘long dêh char hlôi pơm tơm, iung jang hơdoi hăm Dơnŏ anih vei lăng bri apŭng Lạc Dương, Mir pơgar Bri Tĕh đak Bidoup - Núi Bà iung jang dăr lăng hơnĭh ming man trong glung Trường Sơn Đông găh groi tĕh kơ apŭng Lạc Dương, dêh char Lâm Đồng kơ yuơ Dơnŏ anĭh vei lăng Tơdrong jang 46 – Hơnĭh tơm jang tơgŭm ăn, Dơnŏ anih tơm Ƀô̆ đô̆i vei lăng sơlam tĕh đak pơm hơnĭh tang măt pơm tơngla tơmơ̆t jên jang. Mă hơdăh, trong au hơtăih trŭh 3,3km, trong să 4met. Lơ̆m au, hơgăt tĕh tơplih iŏk yoa bri ‘long gĭt kăl jing groi tĕh pơm trong glung ‘nŏh dang 2,3 km. Đei hlŏh 1km trong hơnĭh ming man hlôi bơbĭt iŏk tĕh bri ‘long gĭt kăl tim mă ăn asong tơplĭh jang.  

Tơblơ̆ nơ̆r: Amazưt