VOV4.Bahnar - ‘Năr 10/2, Anih dăr hơ len kơ dêh char Lâm Đồng tơ roi tŏk bŏk jang hơ dai hăm rim anih jang ƀơm truh pơ gơ̆r dăr hơ len tơ drong răt tơ mam jang pơ gang đơ̆ng 2 anih jang lơ̆m dêh char đơ̆ng Kŏng ti Việt Á. Hơ drol ‘noh, dêh char Lâm Đồng băt hơ dăh đei 2 anih jang răt kit hơ len lăng Covid-19 đơ̆ng Kŏng ti kơ măy kơ mŏk Việt Á (Kŏng ti Việt Á) ‘noh Hnam pơ gang Đa khoa II Lâm Đồng (tơ̆ pơ lei tơm Bảo Lộc) păng Anih vei lăng tơ drong jĭ jăn dêh char Lâm Đồng. Tơ drong răt kit hơ len lăng âu đei pơ gơ̆r lơ̆m 3 ‘măng, đơ̆ng khei 2 truh khei 8/2021, hăm akŏp kơ sô̆ 47.000 tơ mam kit, akŏp kơ sô̆ jên hloh 18 ti hlak jên. Vă dăr hơ len tơ drong răt dôm tơ mam jang pơ gang, kit hơ len lăng Covid-19 đơ̆ng rim anih jang đei pơ gơ̆r tơ păt kiơ̆ tơ drong hơ găt, Anih dăr hơ len kơ dêh char Lâm Đồng hlôi đei hla ar athei rim anih jang ƀơm truh ăn bơ ngai vang jang, hơ dai hăm ‘noh tơ lĕch tơ drong tơ chơ̆t dăr hơ len kiơ̆ athei, pơ tho đơ̆ng Anih dăr hơ len khŭl dră teh đak.

Thuem: Tơ blơ̆