VOV4.Bahnar - Dêh char Gia Lai hlôi păng tŏk bŏk tơ lĕch dôm trong jang kăl vă tơ jră hăm ‘mi kial hơ bŭt kơ sô̆ 4. Mĭnh lơ̆m dôm hơ năp jang ‘lơ̆ng đei pơ lei tơm Pleiku tơ lĕch jang ‘noh jĭ kôch hơ met hơ bong đak, kăt hơ leh ‘long lơ̆m anih kơ drơ̆m vă veh ver kơ đak ‘lơ̆p păng ‘long tơ gơ̆ păk mưh tơ ƀơ̆p kial hơ bŭt.

Vă tơ tom tơ jră hăm ‘mi kial hơ bŭt kơ sô̆ 4, lơ̆m dôm năr âu ki păng klĕp truh kơ sơ̆ ‘năr 27/9,  Anih vei lăng anih kơ drơ̆m pơ lei tơm Pleiku jang hơ dai hăm Kŏng ti jang găh tơ drong jang anih kơ drơ̆m pơ lei tơm Pleiku tơ lĕch jang kăt hơ leh kơ hrĕng tơ nơm ‘long rim kơ loăi, nhen, krŏl, xà cừ păng dôm ‘long nai đei tơ bla să tơ̆ trong Lê Hồng Phong, Lê Duẩn, Phan Bội Châu. Hơ dai hăm ‘noh, rim anih jang pơ gơ̆r kôch hơ met lơ hơ bong đak tơ̆ dôm đak glung lơ̆m pơ lei tơm.

Kiơ̆ tơ drong tơ dra đơ̆ng Anih hơ len năng hơ yuh plenh tĕh Lâm Đồng, yoa ƀơm đơ̆ng ‘mi kial kơ sô̆ 4, lơ̆m dang 48 truh 72 jơ truh, tơ̆ dêh char Lâm Đồng đei ‘mi đơ̆ng păh lăp truh ‘mi tih păng tôch tih, lơ tơ ring tôch hơ mơt đei đak lơ̆p, đak tơ jroh păng tĕh hơ lih. Tơ drong jang tang găn sar bar, tơ jră hăm ‘mi kial kơ sô̆ 4 tŏk bŏk đei dôm khul jang kơ pal kơ dêh char Lâm Đồng tơ lĕch jang tôch pơ nĕh. 

Lâm Đồng kơ chăng tang găn hăm đak lơ̆p, đak tơ jrŏh păng tĕh hơ lih

Kiơ̆ tơ drong tơ dra, ‘mi kial kơ sô̆ 4 ưh đei tơ hlu mât tơ păt tơ̆ dêh char Lâm Đồng mă lei yoa ‘mi kial tôch jăng, trong tơ hlu xă kơ na lơ tơ ring lơ̆m dêh char kŭm đei ‘mi tih, kial hơ bŭt, tôch hơ mơt đei đak lơ̆p, đak tơ jrŏh păng tĕh hơ lih. Yoa thoi nŏh, Anih pơ gơ̆r jang tang găn sar bar păng chă dŏng bơ ngai răm dêh char Lâm Đồng pơ tho ăn dôm apŭng, plt, dôm anih jang kơ pal jăh tơ lĕch lơ trong jang tang găn, ưh gơ̆h lăng pơ hơi.

VOV Tây Nguyên – Thuem hăm Dơ̆ng: Tơ blơ̆