Găh tơdrong hơmơt teh tơdrŭt hơlih kơtang tơ̆ rim trong hông hang krang nak D’ran păng Gia Bắc, Hơnih vei lăng kon pơlei dêh char Lâm Đồng hlôi tơchơ̆t tơbăt hơdăh nơ̆r tơbăt hli hlơt hloh găh ‘mi kial pơrăm tơ̆ jăl trong glung 20 păng 28. Khul kơdră tơring iung jang kơtang nhen hơtơ̆p pơ̆ng kơƀang tơbăt hli hlơt, ưh kơ ăn mơ̆t năm tơ̆ groi teh tơdrŭt hơlih, iung jang yông kon pơlei năm oei tơ̆ hơnih sơđơ̆ng. Khul bơ̆ jang iung jang gak vei lăng prăt măng prăt năr vă lăng hơlen, xơkơ̆t hơdăh tơdrong tơm pơm ăn păng pơchoh trong iung jang hơmet pơ ‘lơ̆ng. Rim ‘măng ‘mi tih ou ki pơm ăn nak man trong hông hang krang nak D’ran păng Gia Bắc tơdrŭt, hơlih, pơm tơhlăk trong nơnăm. Hơnih vei lăng kon pơlei dêh char athei rim hơnih bơ̆ jang ƀơm truh tĕnh koăng hơmet pơ ‘lơ̆ng, pơm sơđơ̆ng ăn bơngai păng gre, veh ver đei tơdrong teh tơdrŭt hơlih dơ̆ng lơ̆m khei năr kơnh.

Tơ̆ hơnăp đei ƀôh krê hơmơt đơ̆ng kial hơbŭt Kalmaegi, tơdra hơdrol tak mơ̆t lơ̆m đak dơsĭ Biển Đông ‘năr 5/11, Anih vei lăng kon pơlei dêh char Gia Lai hlôi tơlĕch ăn hla ar kăl, athei tơlĕch jang hloi dôm trong jang tơ jră tơ̆ kớóŏ kơ jung hloh 1 tăl. Rim anih jang, tơring đei athei tơlĕch jang trong jang tang găn kial hơbŭt, ‘mi tih, đak jroh, teh hơlih đơ̆ng hrôih; hơdrin tơklăh kon pơlei tơ̆ tơring thŭng kơđeh, tơ ter đak krong thong đak, groi kông krê hơmơt, jang đang hơdrol kơ ‘năr  4/11. Anih vei lăng kon pơlei dêh char athei bơ̆jang kiơ̆ tơpăt trong jang kăl “4 kơtă anih”, ‘nĕ kơ lê̆ đei ƀôh hiong răm găh bơngai. Anih tơm pơgơ̆r khŭl lĭnh dêh char hơmet ăn tôm khŭl lĭnh, gre, tơmam mă loi ‘noh jĭ thŏng nan păng gre păr ưh kơ đei bơngai huơ̆r pơyua chă dăr lăng, dŏng tơgŭm, dŏng sar. Anih vei lăng găh choh jang sa păng Cham char, Anih vei lăng găh Kơmăy kơmŏk mơdro sa jang hơdai pơchoh đak tơ̆ dơnâu mong đak, dơnâu đak ŭnh điên trŏ lăp, vei sơđơ̆ng tơ̆ gah pơbăh.