VOV4.Bahnar - Pơ gê (8/4), tơ̆ plt Đà Lạt, Dơ nŏ anih vei lăng kon pơ lei dêh char Lâm Đồng pơ gơ̆r hop akŏm pơ tôch tơ drong pơ jei băl ‘mêm tĕh đak sơ năm 2021, tơ lĕch păng kĭ pơ kăp pơ jei băl sơ năm 2022. Hop akŏm đei Phŏ Kơ dră tĕh đak Võ Thị Ánh Xuân, Phŏ Kơ dră mă mônh kơ Jơ nŭm vei lăng Pơ jei pôk hơ păh Trung ương vang akŏm.

Pơ ma tơ̆ hop akŏm, ƀok Trần Đức Quận, Kơ dră jang lơ̆m Trung ương Đảng, Bí thư Đảng dêh char, Kơ dră Jơ nŭm pơ gơ̆r kon pơ lei dêh char Lâm Đồng akhan, mă đơ̆ng iŏk đei lơ tơ drong ‘lơ̆ng mă lei tơ drong pơ jei băl ‘mêm tĕh đak đơ̆ng dêh char oei đei lơ tơ drong tam mă ‘lơ̆ng ‘năi.

Vă hơ met pơ ‘lơ̆ng, hơ nhăk tơ drong pơ jei băl ‘mêm tĕh đak kơ dêh char iŏk đei lơ tơ drong ‘lơ̆ng hlŏh dơ̆ng, athei rim anih jang đảng, khul kơ dră tơ ring đei lơ trong jang mă hơ dăh păng đei yoa.

Ƀlep ƀât ‘măng mă âu, tang măt ăn Jơ nŭm vei lăng pơ jei pôk hơ păh Trung ương, Phŏ Kơ dră tĕh đak Võ Thị Ánh Xuân hơ păh Mê đai rơ ngei dơ̆ng mă 2, Mê đai vei lăng tĕh đak dơ̆ng mă 2 păng lơ mê đai Bơ̆ jang dơ̆ng mă 1, mă 2, mă 3 ăn 24 ‘nu bơ ngai păh 8 khul grŭp iŏk đei jơ nei ‘lơ̆ng hlŏh lơ̆m tơ drong pơ jei băl ‘mêm tĕh đak tơ̆ tơ ring.

Dơ̆ng: Tơ blơ̆