Hăm hơ năn “Đà Lạt – pơ lei tơm puăn pơ yan pơ kao”, Festival pơ kao Đà Lạt ‘măng mă 9 sơ năm 2022 pơ gơ̆r lơ̆m 2 khei, đơ̆ng ‘năr 1/11 truh ‘năr 31/12. Kŭm hăm dôm tơ drong jang pơ gơ̆r găh lơ tơ̆ Đà Lạt, hloh 40 tơ drong jang kiơ̆ kŭm pơ gơ̆r tơ̆ jơ̆p tơ ring nai lơ̆m dêh char. Dang ei 1,2 tơ drong jang kiơ̆ hlôi đei pơ gơ̆r tơ̆ 1,2 apŭng, pơ lei tơm lơ̆m dêh char nhen: Hrŭk pơ rŏ ao tai, pơ dă tơ ƀôh dôm tơ mam đơ̆ng choh jang sa đei, lêh hơ lăk Vang ƀau phu ‘lơ̆ng... Kiơ̆ kơ ƀok Sử Thanh Hoài, Kơ dră Anih vei lăng kon pơ lei apŭng Lạc Dương, dêh char Lâm Đồng, tơ ring hlôi hơ met tôm ăn dôm tơ drong jang kiơ̆ vei sơ đơ̆ng păng ‘lơ̆ng:

“Jang kiơ̆ trong jang đơ̆ng Anih vei lăng kon pơ lei dêh char găh dôm tơ ring lơ̆m dêh char athei vang jang dôm tơ drong jang vă jang kiơ̆ Festival pơ kao Đà Lạt, apŭng Lạc Dương kŭm đei 1,2 tơ drong jang vă jang kiơ̆. ‘Noh jĭ pơ yan lêh ‘nhĕt rơ muay tơ chĕng hơ drol pơ gơ̆r lơ̆m ‘năr 19/11, hơ dai hăm ‘noh apŭng Lạc Dương kŭm pơ gơ̆r tôn chĭng chêng, jang hơ dai hăm dôm anih jang pơ gơ̆r lêh pơ jei seh ưh kơ đei an tơ̆ xăh Đa Nhim”.

Kŭm hăm khŭl kơ dră tơ ring, dôm anih jang pơ vih pơ văn tơ mang lăng nhen hnam mơ dro et sa, hnam hô tel, hơ nih tơ mang lăng... kŭm hlôi hơ met ăn dôm tơ drong kăl vă vei sơ đơ̆ng pơ vua ‘lơ̆ng ‘meh vă đơ̆ng tơ moi. Ƀok Đinh Thiên Long, kơ dră 1 hơ nih mơ dro et sa tơ̆ anih kơ drơ̆m pơ lei tơm Đà Lạt tơ băt, vă jang kiơ̆ Festival pơ kao Đà Lạt ‘măng âu hơ tŏk ‘lơ̆ng pơ vih pơ văn, hơ nih mơ dro sa et sa kơ ƀok hlôi hơ met ăn 1,2 tơ mam sa ‘lơ̆ng đei pơm pai đơ̆ng dôm kơ loăi ‘nhot, ƀum, plei đei hơ drô̆ kơ Đà Lạt.

“Hơ drol kơ Festival ‘noh tơ drong mă blŭng ‘noh nhôn jang đang tơ drong hơ iă đơ̆ng 1 hơ nih mơ dro et sa ‘lơ̆ng pơ vih pơ văn, pơm rơ goh ‘lơ̆ng tơ mam sa vă sơng iŏk lơ tơ moi tơ mang lăngĐà Lạt đei tơ mam lơ păng ‘lơ̆ng, kơ lih thoi noh ĭnh ‘meh tơ moi gô đei lăng băt găh tơ drong tơ mam sa kơ kon pơ lei pơ lei tơm pơ kao.”

‘Ngoăih kơ dôm tơ drong joh ayŏ kơ dŏ soang, ngôi pơ chơt, pơ dă tơ ƀôh dôm tơ mam dơ̆ng choh jang sa đei hơ nhăk hơ năn “Đà Lạt – tơ drong ‘lơ̆ng hơ iă đơ̆ng groi teh ‘lơ̆ng”, pơ kao ‘noh jĭ tơ ‘ngla tơm tŏk bŏk đei khŭl kơ dră tơ ring, kon pơ lei păng anih jang mơ dro sa hăt hot hơ met ăn vă pơ yua ăn chă lăng đơ̆ng tơ moi, mă loi ‘noh jĭ dôm hơ nih đei ming pơ rŏ pơ kao lơ̆m tơ pôl, dôm trong tơm păng jum dăr dơ nâu đak Xuân Hương. Hơ drô̆ Kŏng ti pơ vih pơ văn anih kơ drơ̆m Đà Lạt hlôi hơ met ăn hloh 400 rơ bâu kơ châ̆u pơ kao dôm kơ loăi vă pơ jing dôm hơ nih pơ kao, ming hơ met tơ̆ dôm trong pơ kao lơ̆m năr Festival pơ kao âu.