Hơnih jang vei lăng kon pơlei dêh char Lâm Đồng pơjao ăn Hơnih jang gah Tĕch răt pơgơ̆r, jang atŭm hăm Kŏng an dêh char, Hơnih jang vei lăng kon pơlei xah păng dôm hơnih jang đei tơrĕk dah tenh kuăng chă dăr hơlen hăm hơnih tĕch đak xăng đak dou lơ̆m xah Tà Hine; tơtom sek tơlang tơnăp dôm tơdrong pơm glăi (mưh đei) kiơ̆ sơnong jang păng tơroi truh Hơnih jang vei lăng kon pơlei dêh char hơdrol kơ năr 8/4/2026.

Ƀok Nguyễn Văn Khánh, Phŏ Kơdră Hơnih jang gah Tĕch răt dêh char Lâm Đồng ăn tơbăt, pơm kiơ̆ tơdrong pơgơ̆r đơ̆ng Hơnih jang vei lăng kon pơlei dêh char, lơ̆m năr 1/4 hơnih jang tơlĕch dôm trong jang kăl vă chă hơlen lăng tơdrong tĕch răt đak xăng đak dou tơ̆ xah Tà Hine păng minh ƀar tơring đei ƀôh vei răk đak xăng đak dou 'măn pơyua kơdih.