‘Năr tơning (9/10), Hop akŏm bơngai tang măt Đảng ƀô̆ dêh char Lâm Đồng ‘măng mă I, jăl jang 2025 – 2030 gô đei pơgơ̆r. Tơ̆ Đà Lạt, anih pơgơ̆r hop akŏm păng tơ̆ tơring kơdrâm kơ dêh char Đắk Nông, Bình Thuận so ƀrông ƀrang hla kơ, pơkao tơƀôh ăn jơhngâm đon tơplih ‘nao, hưch hanh kơ hop akŏm. Hop akŏm bơngai tang măt Đảng ƀô̆ dêh char Lâm Đồng ‘măng mă I, jăl jang 2025 – 2030 jĭ tơdrong jang chinh trĭ gĭt kăl tơbăt tơdrong tơmât hơdai đơ̆ng 3 dêh char Đắk Nông, Bình Thuận păng Lâm Đồng, hơnhăk dêh char tih hlŏh kơ teh đak mât lơ̆m chăl jang tŏk tôm tơdrong păng kơjăp ‘lơ̆ng.

Ƀok Nguyễn Khắc Bình, Kơdră Anih pơvih ăn Anih chĕp kơ̆l Đảng dêh char Lâm Đồng, ăn tơbăt: Hla ar kăl kơ Hop akŏm bơngai tang măt Đảng ƀô̆ dêh char Lâm Đồng ‘măng mă I, jăl jang đơ̆ng 2025 – 2030 hlôi chih hơmet tôch hơlen. Hla archinh trĭ hlôi chă iŏk đang nơ̆r tơgop đơ̆ng Mặt trận Tổ quốc păng dôm khul jang chinh trĭ, tơpôl; nơ̆r tơgop tơ̆ hop akŏm 128 đảng ƀô̆, anih jang đảng găh Đảng ƀô̆ dêh char; pơgơ̆r hop akŏm khoa hŏk, tơlĕch trong jang tŏk; atŭm hăm ‘nŏh chih iŏk nơ̆r pơtho đơ̆ng Khul jang kơ Anih tơm Chinh trĭ. Tơdrong hơmet ăn hop akŏm hlôi đei dêh char Lâm Đồng hơmet đang ‘lơ̆ng rim tơdrong.