Khŭl kơdră rim tơring kŭm hăm khŭl lĭnh kơpal kơ dêh char Lâm Đồng dang ei tŏk bŏk hăt hot hơmet pơ ‘lơ̆ng hiong răm hai, hơnơ̆ng kơchăng tơjră hăm ‘mi tih hai. Kŭm hăm tơdrong đak lơ̆p tơ̆ dôm xăh, phường tơring păih Hơlĕch, đak jroh, teh hơlih kŭm đei ƀôh tơ̆ tơring păih Pơmơ̆t dêh char Lâm Đồng pơm ăn 1 ‘nu lôch păng pơm ăn tơhlăk lơ trong nơnăm.

Vă hơnơ̆ng kơchăng tơjră tơ jur tŏ sĕt hloh hiong răm yua đơ̆ng ‘mi tih, teh hơlih pơm ăn, Khŭl pơgơ̆r Tang găn hơdrol kơ dêh char Lâm Đồng athei 124 xăh, phường, tơring gĭt kăl kŭm hăm khŭl lĭnh kơpal pơgơ̆r khŭl jang kơ măng kơ năr hloi; hơlen lăng, dăr lăng dôm tơring kon pơlei tơ ter đak krong, thong đak; tơring thŭng đei hơmơt kơ đei ƀôh đak lơ̆p. Hăm rim tơring đa đei ƀôh teh hơlih, đak lơ̆p nhen kông krang Đại Ninh- Trong gre 28B, kông krang Sông Pha- Trong gre 27, kông krang Gia Bắc- Trong gre 28… dôm xăh păih Hơlĕch tơring thŭng athei ling lang hơmet tôm khŭl lĭnh, gre, tơmam vă dŏng tơgŭm, dŏng sar bar mưh đei ‘meh vă.